Dünyanın nüfuzlu elmi jurnallarından biri olan "The Lancet" Rusiya alimləri tərəfindən hazırlanmış koronavirus əleyhinə "Sputnik V" vaksini ilə bağlı ilk klinik tədqiqatların nəticələrini dərc edib.

Bu barədə Aztibb.az ria.ru saytına istinadən xəbər verir.

Məqalədə qeyd olunur ki, toplanan məlumatlarda rAd26-S və rAd5-S adenoviruslarına əsaslanan xəstələrə tətbiq olunan peyvənd xəstəliklə mübarizədə effektiv olmaqla yanaşı, həm də istifadə üçün təhlükəsizdir. Vaksinin sınaqlarının iki mərhələdə aparıldığı, onun əvvəlcə virusları zəiflətdiyi, daha sonra isə koronavirusun RNT parçalarını insan hüceyrələrinə göndərəcək şəkildə dəyişildiyi bildirilib.

Nəşrdə, həmçinin "Sputnik V" vaksininin effektivliyinə dair elmi sübutlar təqdim edilib. Məsələn, onun iki mərhələdə verilməsi sayəsində peyvənd edilmiş şəxslərin hamısında koronavirusa qarşı uzunmüddətli immun sisteminin yarandığı qeyd olunub.

Qamaleya Mərkəzinin mütəxəssislərinin elmi məqalədə bildirdiyi kimi, əsas tapıntılardan biri də "Sputnik V" vaksininin təhlükəsizliyidir. Klinik tədqiqatların nəticələrinə əsasən mütəxəssislər qiymətləndirilən meyarlar üzrə peyvəndin heç bir ciddi arzuolunmaz təsirini aşkar etməyiblər.