Nəsimi Rayon Polis İdarəsi və Səhiyyə Nazirliyinin İctimai Səhiyyə və İslahatlar Mərkəzinin birgə təşkilatçılığı ilə 54 nömrəli orta məktəbdə “Narkomaniyaya yox deyək!” mövzusunda maarifləndirici tədbir keçirilib.

Aztibb.az xəbər verir ki, tədbirin təşkilində məqsəd şagirdlərin sağlam həyat tərzi barədə dünyagörüşünün formalaşdırılması, narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı maarifləndirmənin aparılması idi.

Tədbirdə bəşəriyyətin ən böyük bəlalarından olan narkomaniyanın cəmiyyətin mənəvi və əxlaqi dəyərlərinə böyük zərbə vurduğu, sosial-iqtisadi inkişafa mənfi təsir göstərdiyi, insanların həyat və sağlamlıqlarına ciddi təhlükə yaratdığı nəzərə çatdırılıb.

Səhiyyə Nazirliyinin İctimai Səhiyyə və İslahatlar Mərkəzinin Layihələrin əlaqələndirilməsi şöbəsinin müdir müavini Ülkər Camalova çıxış edərək, narkomaniyanın və psixotrop maddələrin insan sağlamlığına mənfi təsiri barədə ətraflı məlumat verib, narkotik maddələrdən istifadənin qısa zamanda fiziki və psixi asılılıq yaratdığını diqqətə çatdırıb. O, narkomaniyanın insanı məhvə aparan zərərli vərdiş olduğunu nəzərə çatdıraraq gəncləri sağlam həyat tərzini seçməyə çağırıb.

Nəsimi Rayon Polis İdarəsinin rəisi Mirnemət Mirbabayev respublikamızda narkomaniyaya qarşı mübarizə sahəsində görülən işlərdən söz açıb, yeniyetmələri, gəncləri zərərli vərdişlərdən uzaq olmağa səsləyib.

Tədbirin sonunda iştirakçıları maraqlandıran suallar cavablandırılıb və onlara maarifləndirici materiallar paylanılıb.