Almaniyanın Köln Universiteti Klinikasının tibb elmləri doktoru, azərbaycanlı alim Nuran Abdullayevin COVID-19-la bağlı apardığı növbəti elmi tədqiqat nüfuzlu Amerika Radiologiya Cəmiyyəti tərəfindən yüksək qiymətləndirilib.

Aztibb.az xəbər verir ki, tədqiqat noyabr ayından videoformatda keçiriləcək radiologiya üzrə konqres üçün elmi məruzə kimi qəbul edilib.

Bu, qeyd olunan təşkilatın azərbaycanlı alimdən qəbul etdiyi ilk elmi tədqiqatdır. Bundan əlavə, Köln Universiteti Klinikasının Radiologiya İnstitutunun COVID-19-la əlaqədar orada təqdim edəcəyi ilk elmi layihədir. 

Elmi tədqiqatda xəstələrdə öncədən aortada və ürəyin tac damarlarında yaranan kirəcləşmənin COVID-19-un proqnozundakı rolu sübut edilib. Bundan başqa, xüsusi metodla ölçülən damarların kirəcləşmə səviyyəsinin xəstəliyin kliniki gedişinə birbaşa təsiri elmi şəkildə təsdiqlənib.

Qeyd edək ki, Nuran Abdullayev virusun tədqiqi, xəstəliyin müxtəlif pasiyentlərdə proqnozu və kliniki gedişi barədə bir neçə elmi araşdırma işini tamamlayıb. Aparılan tədqiqatların nəticələri ictimaiyyətə müvafiq elmi jurnallarda dərc edildikdən sonra tam açıqlanacaq. Azərbaycanlı alimin işçi qrupu ilə birlikdə "COVID-19 diaqnostikasında Süni intellektin rolu" mövzusunda hazırladığı layihə Almaniyanın müvafiq elmi distansiyalarında yüksək qiymətləndirilib.