Bu gün AR Səhiyyə Nazirliyində Ümumdünya Səhiyyə Təşkilatının (ÜST) qiymətləndirmə missiyasının nümayəndələri ilə görüş keçirilib.
Missiyanın məqsədi Azərbaycanda mövcud vəziyyətin qiymətləndirilməsi və müvafiq tövsiyələrin verilməsidir. Eyni zamanda, ÜST nümayəndələri COVID-19 və ya hər hansı fövqəladə hallarla əlaqədar Fövqəladə Hallara Cavab Məlumat İdarəetmə Sistemini (ERİMS) təkmilləşdirmək və COVID-19 üçün mövcud sistemin ümumi məlumatlar axını sisteminin tərtib olunmasına dair texniki dəstək məqsədilə Azərbaycana gəliblər.
Qarşılıqlı anlaşma şəraitində keçən toplantıda Azərbaycanda hazırkı vəziyyət və COVID-19 infeksiyasına qarşı görülən tədbirlər müzakirə edilib.
Tədbirdə çıxış edən səhiyyə nazirinin müavini Viktor Qasımov ÜST nümayəndələri ilə Azərbaycan arasında illərdir davam edən məhsuldar işbirliyinin olduğunu bildirib, bu əməkdaşlığın gələcəkdə daha yüksək nəticələr verəcəyinə inamını ifadə edib. Nazir müavini görülən işlərə görə bütün missiya üzvlərinə minnətdarlığını bildirib.
Daha sonra ÜST-ün missiyasının rəhbəri Paula Vaskonselos “COVID-19 və ya hər hansı digər fövqəladə hallarla əlaqədar Fövqəladə Hallara Cavab Məlumat İdarəetmə Sistemini təkmilləşdirmək” mövzusunda təqdimatla çıxış edib. O, qeyd edib ki, Səhiyyə Təşkilatı COVID-19 infeksiyasının geniş yayılmasının qarşısını alınmaq məqsədilə koronavirus pandemiyası başlayan gündən ölkəmizlə yaxından əməkdaşlıq edir və birlikdə bir sıra layihələr həyata keçirir. “Göstərilən dəstək ictimai səhiyyə sahəsində fövqəladə halların qarşısını effektiv formada alınması, aşkarlanması və tədbirlərin gücləndirilməsi məqsədi daşıyır”, - deyə Paula Vaskonselos əlavə edib.
Missiyanın rəhbəri ölkəmizdə səhiyyə sahəsində müasir informasiya texnologiyalarının imkanlarından, xüsusən də Yoluxucu Xəstəliklərin Elektron Müşahidə Sisteminin (YXEMS) geniş istifadə olunmasını yüksək qiymətləndirib. O, YXEMS sisteminin Azərbaycan modelinin digər ölkələrdə də tətbiq olunmasını tövsiyə edəcəyini bildirib.
Qeyd edək ki, ÜST nümayəndələri və ekspertlərinin missiyası qiymətləndirmə aparılması məqsədilə ölkəmizin səhiyyə obyektlərini ziyarət edib.
