Koronavirus xəstələrinə mədəqoruyucu kimi proton pompa inqibitorları (omeprozol, pantaprozol, esomeprozol və s.) yazmağa ehtiyac yoxdur.

Aztibb.az xəbər verir ki, tanınmış həkim-reanimatoloq Şahin Məmmədov "Facebook"da bu barədə tövsiyələr verib.

Həkimin sözlərinə görə, tədqiqatlar bu preparatların virusun şiddətini artırdığını göstərib. Onların əvəzinə H2 histamin blokatorları, xüsusən famotidin (kvamatel) təyin etmək daha məqsədəuyğundur:

"Famotidinin COVID-19 əleyhinə təsiri kiçik tədqiqatlarda sübut edilmişdir. Bu preparatın xəstəxanada yatış müddətini, süni tənəffüsə ehtiyac günlərini azaltdığı, xəstənin halını yüngülləşdirdiyi məlum olmuşdur".

Həkim əlavə edib ki, ABŞ-ın prezidenti Donald Trampın müalicəsində də famotidin istifadə olunduqdan sonra bu pereparata görə genişmiqyaslı tədqiqatlara başlanılıb. Tədqiqatlardan birində sutkalıq 320 mg famotidin istifadə olunur, lakin bəzi alimlər bu dozanın yüksək olduğunu vurğulayır. Onlar əsasən, 40 mg-dan 3 dəfə verilməsinin tərəfdarıdırlar.