Qonşu Rusiyada da artıq koronavirusun yeni omikron ştamı ilə yoluxmuş xəstələr aşkarlanıb. Mütəxəssislərin verdikləri məlumata görə, xəstəliyin yayılmasının mənbəyi Misirə səfər etmiş vətəndaşlardır. ÜST omikron ştamının koronavirusun digər növlərindən daha yoluxucu olması ilə bağlı hələlik heç bir məlumata malik deyil. Cənubi Afrika Respublikasının Səhiyyə Assosiasiyasının sədri A.Ketzinin dediyinə görə, omikron ştamına yoluxmuş xəstələrdə iybilmə və dadbilmə itməsə də, xəstəlik kəskin yorğunluq, əzələ ağrıları və ürək döyüntülərinin sürətlənməsi ilə müşayiət olunur.

 

Həkimin sözlərinə görə, omikron ştamının çoxlu mutasiyaları var və o delta ştamından daha təhlükəlidir. Bununla belə, bu yeni ştamın təhlükəsi barədə çox danışmaq olmur, belə ki, onun xüsusiyyətləri hələ tam öyrənilməmişdir. ÜST-dən bildirilib ki, bir çox ölkələrdə Afrikadan gələn vətəndaşların test olunması və 14 gün karantində saxlanılması təmin olunmalıdır. Azərbaycanda koronavirus xəstələrinin heç birində omikron ştamı aşkar edilməyib.

 

"Bir həkim kimi yenə də “qızıl qaydalar”a riayət olunmasını məsləhət görürəm: yeni ştamdan qorunmaq üçün peyvəndlənmə prosesi davam etməli, tibbi maskadan istifadə edilməli, gigiyenik qaydalara: əllərin yuyulması və ya spirtlənməsi, sosial məsafənin saxlanması, insanların sıx yığışdığı yerlərə gedilməməsi, xəstəliyə yoluxduqda dərhal təcrid olunma və s. qaydalara ciddi riayət olunmalıdır", - deyə həkim tövsiyələrini verib.