Lənkəran Şəhər Rayon Polis Şöbəsinin təşkilatçılığı ilə şəhər 2 nömrəli tam orta məktəbdə “Narkomaniyaya yox deyək” mövzusunda görüş keçirilib.

Daxili İşlər Nazirliyinin mətbuat xidmətindən bildiriblər ki, Lənkəran Şəhər Rayon Polis Şöbəsinin rəisi, polis polkovniki Azər Cahangirov çıxış edərək əsrin bəlası olan narkomaniyaya qarşı mübarizəni təmin etmək məqsədilə belə tədbirlərin keçirilməsinin mühüm əhəmiyyətə malik olduğunu deyib. Şöbə rəisi narkomaniyanın səbəb olduğu ağır fəsadlar barədə məlumat verərək qeyd edib ki, nazirliyin və yerli polis orqanlarının əməkdaşları narkotik vasitələrin və psixotrop maddələrin qanunsuz dövriyyəsinə qarşı qətiyyətli mübarizə tədbirləri görməklə yanaşı, həm də yeniyetmə və gənclərlə vaxtaşırı maarifləndirici görüşlər keçirirlər. Məqsəd gənc nəslin sağlam böyüməsinə, valideynlərinin etimadını doğrultmasına, Vətənə layiqli övlad kimi yetişməsinə töhfə verməkdir.

Sonra çıxış edən şəhər təhsil şöbəsinin müdiri Ülviyyə Əliyeva, Lənkəran Rayonlararası Narkoloji Xəstəxanasının baş həkimi Vüqar Əliyev və digərləri polis əməkdaşları tərəfindən məktəblilərlə belə görüşlərin keçirilməsini yüksək qiymətləndirib, şagirdləri bu həssas mövzuya diqqətlə yanaşmağa, verilən dəyərli tövsiyələrə əməl etməyə çağırıblar.

Sonda tədbir iştirakçılarının sualları cavablandırılıb.