Türkiyənin Səhiyyə Nazirliyinin Sağlamlıq İnstitutları Başkanlığının Peyvənd Elmi Komitəsinin üzvü, Akdeniz Universitetinin professoru, AMEA-nın müxbir üzvü Tərlan Məmmədov və onun rəhbərlik etdiyi qrupun hazırladığı kokteyl peyvəndinin istehsalı ilə bağlı məqalə nüfuzlu “Vaccines” jurnalında nəşr edilib.

Bu barədə Aztibb.az-a prof. Tərlan Məmmədov özü məlumat verib.

Məqalədə dünyada ilk dəfə olaraq azərbaycanlı alimin ixtirası ilə hazırlanmış (patent müraciəti 2020-ci ilin dekabrında ABŞ Patent və ticarət nişanı ofisinə təqdim edilib) COVID-19-a qarşı kokteyl peyvəndinin mühəndisliyi və pre-klinik tədqiqatlarından bəhs edilir.

Tərlan Məmmədov qeyd edib ki, məqaləyə daxil olan rəyçi şərhində məqalənin dünyada mövcud olan COVID-19 problemlərinin həllinə yönəldiyi və koronavirusa qarşı ilk dəfə peyvənd namizədi kimi SARS-CoV-2-nin Nucleocapsid və RBD kokteyl antigenlərinin Nicotiana benthamiana-da istehsalı, mühəndisliyi və xarakteristikası ilə bağlı nəticələrin təqdim edildiyi bildirilib.

Qeyd edək ki, “Vaccines” jurnalının 5 illik impakt faktoru 5,513-ə (2020) bərabərdir.