“Dünyada bu gün üçün təxminən 3 000-dən çox vaxtından əvvəl doğulmuş körpə dünyasını dəyişəcək. Bu, bir günün statistikasıdır, ildə isə 1 milyondan çox körpə ölümü deməkdir”.

Aztibb.az xəbər verir ki, bu fikirləri Ümumdünya Səhiyyə Təşkilatının (ÜST) Azərbaycandakı nümayəndəsi Hande Harmancı TƏBİB-in Davamlı tibbi təhsil və tibbi təlimlər şöbəsi tərəfindən keçirilən "Beynəlxalq Vaxtından Əvvəl Doğulmuş Uşaqlar Günü"nə həsr olunmuş onlayn konfransda deyib.

Hande Harmancı bildirib ki, ölməyib sağ qalan həmin körpələrin böyük bir qismi həyatları boyunca görmə, eşitmə və öyrənmə problemi yaşayacaq: “Bütün bu hallar çox kədərli haldır. Halbuki həmin körpələrin həyatları ucuz başa gələn tibbi müdaxilərlə qurtarıla bilər. Bu istiqamətdə məlumatlılıq artırılmalıdır”.

O, bildirib ki, ÜST tərəfindən vaxtından əvvəl doğulmuş körpələrlə bağlı bilik və məlumatların artırılması istiqamətində işlər görülür, hər il müxtəlif layihələr hazırlanır, erkən doğulmuşların hansı səbəblərdən dünyasını dəyişdiyi araşdırılır. Bundan başqa, klinik olaraq lazımi tədbirlərin görülməsi yönündə müxtəlif ölkələrdəki agentlik və müvafiq qurumlarla birgə işlər həyata keçirilir. ÜST dünyadakı ölkələrə bu sahədə texniki dəstək göstərməyə çalışır.

“Mən də vaxtından əvvəl doğulan iki uşaq anasıyam. Əgər bu sahədəki tədbirlərdən xəbərsiz olsaydım, bəlkə də övladlarım yaşamayacaqdı. Vaxtından əvvəl doğulan körpələrin ağciyərlərini açmaq üçün lazım olan dərman ölkədə 1 dollardan ucuzdur. Lakin bir çox ölkədə həmin dərman tapılmır”, – deyə H.Harmancı əlavə edib.