Aztibb.az xəbər verir ki, ATU-nun Tədris Terapevtik Klinikasının dosenti, həkim-terapevt, tibb üzrə fəlsəfə doktoru Azadə Rəhimova "Sakit miokard infarktı necə tanınmalı?" sualını cavablandırıb.

 

 

Həkimin sözlərinə görə, risk qrupuna daxil olan insanlar (kişi cinsi, hipodinamiya, şəkərli diabet, piylənmə, arterial hipertenziya, siqaret çəkmə, içki qəbulu və s.) ürək nahiyəsində ağrı əvəzinə bəzən sol qolda uyuşma, ürəkbulanma, qusma, başgicəllənmə, təngənəfəslik kimi qeyri-spesifik əlamətlər hiss edə bilər:

 

"Ürəkbulanma, qusma əlamətləri olduğundan səhvən qida zəhərlənməsi kimi də dəyərləndirilir. Həmçinin xəstələrdə öskürək və boğulma əlamətləri də görülə bilir, bu da bronxial astmanı imitasiya edir. Bu əlamətlər bəzən cüzi olduğundan xəstəni çox da narahat etməyə bilir, ona görə də həkimə müraciət olunmur. Bu da ağır fəsadlarla nəticələnə bilər.

 

Yadda saxlamaq lazımdır ki, düzgün həyat tərzi, ziyanlı vərdişlərdən uzaq durmaq ürəyi qoruyur. Şikayətlər varsa, mütləq həkimə müraciət etmək lazımdır. Diaqnoz yalnız mütəxəssis tərəfindən, hərtərəfli müayinə nəticəsində qoyulur".

 

"Vaxtında həkimə müraciət etmək həyat qurtarır!", - deyə həkim çağırış edib.