Məlumdur ki, 13 noyabr - Beynəlxalq Gözdən Əlillər Günüdür. Təqvimə “Gözdən Əlillər Günü” kimi düşən həmin gün fransız pedaqoqu, görməyənlər üçün relyefli əlifbanın müəllifi, gözdən əlillər üçün ilk təhsil müəssisələrinin yaradıcısı, məşhur xeyriyyəçi Valentin Qayuinin doğum günü ilə əlaqədardır. Bu tarixin əsas məqsədi ictimaiyyətin diqqətini korluğa və görmə qabiliyyətini itirmiş insanların problemlərinə cəlb etməkdir. Dünya Səhiyyə Təşkilatının hesablamalarına görə, hazırda dünyada 1,3 milyarddan çox insan müxtəlif göz problemlərindən əziyyət çəkir.

 

Həkimin sözlərinə görə, onlardan 39 milyonu tamamilə görmür. 19 mln. uşaq göz xəstəliklərinin qurbanıdır. Görmə ilə bağlı problemləri olan insanların sayı 124 milyondur. Gözdən əlillər arasında çox məşhur insanlar olub: dünyaya “İliada” və “Odisseya”nı bəxş etmiş qədim yunan şairi Homer, alman filosofu Yevgeni Dürinq, bolqar məşhur öncədən görən Vanqa, heykəltəraş Lina Po, ingilis caz pianoçusu və kvintet rəhbəri Corc Şirinq, əfsanə-adam Rey Çarlz, amerikalı müğənni, bəstəkar, multi-instrumentalist, aranjimançı və prodüser Stivi Uander, italyan opera müğənnisi Andrea Boçelli, Everest zirvəsinə qalxan dünyanın ilk alpinisti Erik Veyxenmayer.

 

Bu siyahını artırmaq da olar. Lakin hazırda bütün dünyada tibb və texnologiyalar inkişaf etmişdir və görmə qabiliyyəti zəifləyən, göz xəstəliklərindən əziyyət çəkən hər kəs vaxtında və düzgün müalicə aldıqda korluğun qarşısı alına bilər. Vaxtında edilən müalicə ilə 80 faiz hallarda görməni tamamilə itirmənin qarşısını almaq mümkündür. Azərbaycanda 50 min nəfərə yaxın görmə məhdudiyyətli və görmə qabiliyyəti zəif olanlar var:

 

"Bəzən valideynlər uşaqların aşırı dərəcədə kompüterlə və mobil telefonla vaxt keçirməsinə göz yumurlar. Bütün bunlar gözə pis təsir göstərir. Ona görə də, uşaq yaşlarından başlayaraq, övladlarınızın gözlərini müxtəlif xəstəliklərdən qoruya bilərsiniz. Bunun üçün uşaqlarınızın vaxtlarını necə keçirnəsinə nəzarət etməli, asudə vaxtlarının səmərəli keçməsi üçün onlara məsləhətlər verməlisiniz, telefon və kompüterdə məşğul olmaq üçün ayrıca vaxt ayırmalısınız.

 

Gözlə bağlı hər hansı bir problemlə qarşılaşarkən mütləq həkimə müraciət etməlisiniz. Belə olduqda, gözlə bağlı xəstəliklərin, ilk növbədə isə, görmə qabiliyyətinin zəifləməsinin, itirilməsinin qarşısını almaq mümkün olur.

 

Biz həyatın gözəlliklərini gözlərimizlə görür, duyur, hiss edirik. Özünüzü dünyanın gözəlliklərindən məhrum etməyin. Müalicəsi mümkün olan göz xəstəliklərindın qurtulmaq üçün vaxtında həkimə müraciət edin. Müntəzəm olaraq oftalmoloq müayinəsindən keçmək və sadə qaydalara riayət etməklə uzun müddət normal görmə qabiliyyətini saxlamaq mümkündür".