Hazırda Mübariz Əsgərov adına Salyan şəhər Birləşmiş Uşaq Xəstəxanasının poliklinika şöbəsinin ali dərəcəli həkim pediatrı kimi çalışan Əlisəftər Axundov bu günlərdə 90 yaşını qeyd edib. 

Aztibb.az xəbər verir ki, Əlisəftər Mehdiqulu oğlu Axundov 1930-cu ildə Salyan şəhərində, Əli bəy Hüseynzadənin doğulduğu Köhnəbərəağzı məhəlləsində dünyaya gəlib. Orta məktəbi başa vurduqdan sonra 1948-ci ildə Azərbaycan Dövlət Tibb İnstitutunun "Pediatriya" fakültəsinə daxil olub və 1954-cü ildə həmin institutu bitirib. O vaxtdan Bakı, Neftçala, Salyan, həmçinin, başqa şəhər və rayonlarda uşaq məsləhətxanasının müdiri, baş pediatr, uşaq poliklinikasında şöbə müdiri, Tibb İnstitutunun Uşaq xəstəliklərinin müalicəsi fakültəsində ordinator, baş həkimin müavini, baş həkim, Birləşmiş Uşaq Xəstəxanasının poliklinika şöbəsinin müdiri və başqa vəzifələrdə çalışıb. 

Uzun illər boyu uşaqların sağlamlığının keşiyində duran Əlisəftər Axundova 90 yaşında da çox sayda müraciətlər olunur.

"Müalicə etdiyim uşaqlar arasında indi yüksək vəzifələrdə çalışanlar, həkim, müəllim, mühəndis işləyənlər, idarə və müəssisə rəhbəri olanlar var. Onlar mənə deyəndə ki, bizi siz müalicə etmisiniz, fərəhlənirəm, onlarla fəxr edirəm. İndi mənim yanıma öz övladlarını, nəvələrini gətirirlər", - deyə həkim bildirib.