Gəncə şəhərində 44 günlük vətən müharibəsində yaralanan əsgərlərə xidmət göstərmiş tibb işçilərinin iştirakı ilə 8 noyabr - Zəfər Gününə həsr edilmiş tədbir keçirilib.

 

Tədbirdə Gəncə Şəhər İcra Hakimiyyəti başçısının müavini Adil Tağıyev, TƏBİB-in İctimaiyyətlə əlaqələr və mürəciətlərlə iş departamentinin rəhbəri Aygün Əliyeva, “Gəncə Şəhər Birləşmiş Xəstəxanası” publik hüquqi şəxsin direktoru Nazim Əhmədov, Mərkəzi Neftçilər Xəstəxanasının Cərrahiyə və orqan transplantiyası şöbəsinin müdiri Elmir Əsgərov, Gəncə şəhərində fəaliyyət göstərən tibb işçiləri iştirak edib.

 

İlk olaraq qonaqlar ümummilli lider Heydər Əliyevin Gəncə şəhərində yerləşən büstünü, eləcə də respublikamızın müstəqilliyi uğrunda canlarını qurban vermiş Gəncə şəhidlərinin məzarlarını və 44 günlük Vətən müharibəsində ermənilər tərəfindən raket hücumlarına məruz qalmış ərazini ziyarət edib.

 

Tədbir Vətən müharibəsi şəhidlərinin müqəddəs ruhlarının bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başlanılıb.

 

Sonra müharibə zamanı Gəncə şəhərinə düşmən tərəfində edilmiş raket hücumlardan bəhs edən sənədli film nümayiş etdirilib.

 

Mərasimdə çıxış edən departamet rəhbəri Aygün Əliyeva Müzəffər Ali Baş Komandan İlham Əliyevin rəhbərliyi ilə ordumuz tərəfindən qazanılan qələbənin 200 illik dövlətçilik tariximizin ən şanlı səhifəsi olduğunu bildirib. O, ölkə başçısı tərəfindən səhiyyə sahəsinə göstərilən qayğının, cəbhə boyu ərazilərdə müasir tipli xəstəxana komplekslərinin, xəstəxanaların inşa edilməsinin, eyni zamanda ixtisaslı həkimlər tərəfindən göstərilən fəaliyyətin 44 günlük Vətən müharibəmizin az itki ilə qazanılmasında böyük rol oynadığını qeyd edib.

 

Daha sonra Nazim Əhmədov və Elmir Əsgərov çıxış edərək Vətən müharibəsi zamanı ordumuzun taktiki gedişləri kimi, Azərbaycan həkimlərinin fəaliyyətinin də müxtəlif ölkə mütəxəssislərinin marağına səbəb olduğunu bildiriblər.

 

Sonda Aygün Əliyeva TƏBİB-in İdarə Heyətinin sədrini vəzifəsini icra edən Vüqar Qurbanovun Vətən müharibəsi zamanı Gəncə şəhərində fəaliyyət göstərən tibb işçilərinə ünvanladığı təbrikini səsləndirib.