Azərbaycan Tibb Universitetinin Stomatoloji Klinikasında süni intellekt mövzusuna həsr olunmuş seminar keçirilib. Seminarı klinikanın direktoru Mahir Səfərov açaraq Ankara Universitetinin Stomatologiya fakültəsinin dekanı, professor. dr. Kaan Orhanın ölkəmizdə işgüzar səfərdə olduğunu bildirib.

 

Daha sonra K.Orhan klinikanın həkimləri, tələbə və rezidentləri üçün “Stomatologiya və təhsildə süni intellekt – virtual reallıq simulyasiya texnologiyaları” mövzusunda çıxış edib. 

 

Professor K.Orhan “süni intellekt” ifadəsinin yaranma və onun müasir dövrümüzdə tətbiqindən söhbət açıb. Modern kompüterlərin atası sayılan Alan Turinqin süni intellekt mövzusunda ilk dəfə 1950-ci ildə qələmə aldığı "Hesablama maşınları və şüur" məqaləsində toxunduğunu bildirib: “Alan Turinq “Mind” jurnalında dərc etdirdiyi həmin məqalədə insan ilə kompüterin arasında gedən “Turinq testi”ndən danışıb. 

 

K.Orhan, həmçinin süni intellektin tətbiqi ilə kompüter sistemlərinin və digər süni cihazların köməyi ilə düşüncə və hərəkətin yaradıldığını qeyd edib. O, virtual sahədə reallıqlardan, simulyasiya texnologiyalarından söhbət açıb, nümunələr təqdim edib. Bu texnologiyanın bir çox sahələrdə olduğu kimi, tibb sahəsində, o cümlədən radioloji və stomatoloji sahələrdə də tətbiq edildiyini bildirib. Gələcəkdə bu sahənin inkişafında təxmin edilmiş fərziyyələri, müayinələr zamanı bir çox xəstəliklərin aşkar edilməsində effektiv vasitə olduğunu diqqətə çatdırıb.

 

Seminar müzakirələrlə davam edib.