Mərkəzi Gömrük Hospitalında 8 Noyabr - Zəfər Gününə həsr olunmuş tədbir keçirilib.

 

Tədbirdə Azərbaycan Respublikası Dövlət Gömrük Komitəsi (DGK) Tibbi Xidmət İdarəsinin rəisi Ceyhun Məmmədov, Tibbi Xidmət İdarəsinin rəis müavini Elnurə Novruzlu, Mərkəzi Gömrük Hospitalının baş həkimi Elman Məmmədov, eləcə də DGK Tibbi Xidmət İdarəsinin və Mərkəzi Gömrük Hospitalının əməkdaşları iştirak ediblər.

 

Əvvəlcə Azərbaycan Respublikasının Dövlət Himni səsləndirilib, Vətən uğrunda canından keçən şəhidlərin əziz xatirəsi bir dəqiqəlik sükutla yad edilib.

 

Tədbiri giriş sözü ilə DGK Tibbi Xidmət İdarəsinin rəisi Ceyhun Məmmədov açıb. O, Azərbaycan Prezidenti, Ali Baş Komandan İlham Əliyevin rəhbərliyi ilə rəşadətli Ordumuzun 2020-ci il sentyabrın 27-də başlanan və 30 illik işğala son qoyan 44 günlük Vətən müharibəsində göstərdiyi şücaətlərdən, qəhrəmanlıqlardan, xalqımızın birliyindən danışıb, qazandığımız Böyük Zəfərin əhəmiyyətini vurğulayıb.

 

İdarə rəisi Vətən müharibəsinin möhtəşəm qələbə ilə başa çatmasında Mərkəzi Gömrük Hospitalının əməkdaşlarının da payı olduğunu vurğulayıb və VMF-in Azərbaycanın Vətən müharibəsindəki Zəfərinə həsr edilmiş “Qarabağ Azərbaycandır!” kolleksiyasından olan “Miras Qələbə vaxtı” xatirə saatlarını onlara hədiyyə edib.

 

Sonra Azərbaycan Respublikasının Prezidenti, Müzəffər Ali Baş Komandan İlham Əliyevin 2020-ci ilin 8 noyabr tarixindəki çıxışının videoçarxı nümayiş etdirilib. 

 

Tədbirdə DGK Tibbi Xidmət İdarəsinin rəis müavini Elnurə Novruzlu, Mərkəzi Gömrük Hospitalının Xəstə xidmətləri şöbəsinin rəisi Dr. Gülşən İmanova, Travmatologiya şöbəsinin rəisi Dr. Ramin Rzayev və tibb bacısı Nərmin Fərəcova çıxış edərək Mərkəzi Gömrük Hospitalın 44 günlük müharibə zamanı hərbçilərə göstərdiyi tibbi xidmətlər barədə məlumat veriblər. Çıxış edənlər 2020-ci ilin yaddaşlardan silinməyəcəyini, şəhid olan bacı və qardaşlarımızın əziz xatirələrinin daim qəlbimizdə yaşayacağını söyləyib.

 

Mərkəzi Gömrük Hospitalının təcili yardım həkimi Racu Nəbiyev 44 günlük Vətən müharibəsində iştirak edən DGK Tibbi Xidmət İdarəsinin Maliyyə şöbəsinin inspektoru Nicat Həsənovun, patomarfoloq Emin Mirzəyevin, DGK "Azərterminalkompleks" Birliyindən Mərkəzi Gömrük Hospitalına təhkim olunmuş IT mütəxəssisi Kamran Mirzəyevin və DGK Baş Gömrük Mühafizə Xidmətindən Mərkəzi Gömrük Hospitalına təhkim olunmuş mühafizəçi Süleyman Süleymanovun adından çıxış edərək Tibbi Xidmət İdarəsinin rəisi Ceyhun Məmmədova və Mərkəzi Gömrük Hospitalının baş həkimi Elman Məmmədova onlara göstərdiyi diqqət və qayğıya görə minnətdarlığını bildirib.