Saturasiya qanın oksigen ilə doymasıdır. İnsan hər nəfəs aldıqda ağciyərlər, ilk növbədə oksigen dozasını alır, sonra onu paylaşdırıb hüceyrələrə çatdırır. Ona görə qana nə qədər oksigen keçdiyini saturasiyanı ölçməklə bilmək olur.

Aztibb.az xəbər verir ki, saturasiya normada 96-99 arası olmalıdır.

Hansı xəstəlik və problemlərdə insanın saturasiyası aşağı düşə bilər?

- Artıq çəkili, piyli insanlarda əksər hallarda 95-96 olur.
- Anemiya, qanazlığı;
- Təzyiqi olanlarda;
- Ürək-damar xəstəliklərində;
- Ağciyər xəstəliklərində;
- Əməliyyatdan sonra;
- Ağır travmalarda;
- Beyin qan dövranı pozulmasında;
- İnsultlarda;
- Koronavirus və digər infeksiyalarda;
- Pnevmoniyada.

Saturasiyanı nəzarətdə saxlamaqla xəstəliyin gedişatını və ağciyərlərdə nə qədər fəsad yaratdığını bilmək olar.

Təhlükəli hədd:

Əgər qanda saturasiya 93-dən aşağı düşübsə, bu artıq xəstəxanaya getmək üçün əsasdır. Əgər saturasiya 80-dən aşağı göstərirsə, xəstə İBL, tənəffüs aparatına qoşulmalıdır.

Xəstəni uzun müddət aşağı saturasiya ilə evdə saxlamaq olmaz, bu hipoksiya yaradır, beyin və ürək toxumasını qansız qoyur.

Çox siqaret çəkən insanlarda normalda saturasiya 92 ola bilir.

Əgər saturasiya 94 göstərirsə, oksigen aclığı yaşamamaq üçün tədbirlər görülməlidir.

Hipoksemik koma artıq saturasiya 60-dan aşağı düşəndə baş verir və xəstə həyatını itirir. Saturasiyanı xəstəxanada, reanimasiyada xüsusi ekranlı cihazda mütəmadi yoxlayırlar.

Digər hallarda və evdə barmağa taxılan pulsoksimetr adlı portativ cihazla ölçülür. Pandemiya dövründə geniş istifadə olunan bu aparat ya barmağa, ya da qulaq ucuna taxılır. Burda həm saturasiya, həm də ürək nəbzi göstərilir. Qadınlarda dırnaqda boya, şellak və ya süni dirnaq olduqda ölçmə düzgün aparılmır.