Sağılmış ana südünü uzun müddət saxlamaq üçün ÜSULLAR

03.11.2021 12:24

Südün ilk aylar artdığını və körpə üçün hər damcısının çox dəyərli olduğunu nəzərə alaraq bilməliyik ki, onun sağılması və saxlanılması qaydalarına riayət etmək önəmlidir. İşləyən analar üçün südü sağmaq daha böyük önəm daşıyır.

Aztibb.az xəbər verir ki, pediatr-neanotoloq Nurəngiz Hacıyeva bu barədə məlumat paylaşıb.

Onun sözlərinə görə, südü sağmazdan əvvəl əlləri yaxşı yumaq, saxlanma qablarını sterilizə etmək vacibdir.

Dondurulmuş südün üzərinə yeni sağılmış südü əlavə etmək olar. Lakin əvvəlcə təzə südü sərinlətmək lazımdır. Südü qaba boşaldarkən şüşənin ağzından 2-2,5 sm boş yer buraxılmalıdır, çünki süd donanda genişlənir:

"Əlbəttə, sağılan südün sağlam, təmiz şəraitdə saxlanması da vacibdir. Soyuducuda saxlanmaq üçün strelizə edilmiş sərt qapaqlı, çölü sərt plastikli, qapağı qətiyyən hava keçirməyən şüşə qablar istifadə edilməlidir. Belə qablar hazır şəkildə satılır. Sərt plastikdən hazırlanmış şəffaf qutular da istifadə edilə bilər. Körpəni yedirərkən yeni sağılmış südü yox, çoxdan sağılmış südü vermək məsləhət görülür. Südün buzu açılan kimi uşağa içizdirilməlidir. Artıq saxlamaq olmaz".

Bəs ana südü sağılıb necə saxlanmalıdır?

Dondurulmuş süd soyuducunun içindəki ümumu buzluqda 2 həftə saxlanıla bilər. Çünki qapısı daim açılıb-bağlanır, bu da südün keyfiyyətinə təsir edir.

Ayrıca ağzı açılmayan buzluqda konteynerə yerləşdirilmiş sağılmış südü isə 6 ay saxlamaq olar.

Bəzən uşaqlar xəstəxana şəraitində bəslənməli olur. Belə hallarda xəstəxana şəraitində sağılmış südü otaq temperaturunda, təxminən 25 dərəcə selsiyə qədər - 4 saat saxlamaq olar. Xəstəxanın soyuducusunda yalnız - 48 saat saxlamaq olar.

N.Hacıyeva qeyd edib ki, donmuş südü isidərkən əvvəlcə soyuducunun aşağı gözündə saxlamaq lazımdır. Sonra isti su ilə dolu kasaya qoymaq, ya da axar suyun altına tutmaq olar. Südün donu öz-özünə açılmalıdır. 6 aydan sonra körpələr də soyuq süd içə bilər.