Aztibb.az xəbər verir ki, bu barədə həkim-pediatr Aytən İsmayılzadə məlumat verib.

 

Həkimin sözlərinə görə, hipertermik sindrom - hərarətin yüksəlməsi uşağı nə dərəcədə narahat edirsə, hipotermik sindrom yəni hərarətin düşməsi də eyni dərəcədə narahat edir. Fərq ondadır ki, hərarət aşağı olduğu zaman bədən soyuq olur və biz onu isitməyə çalışırıq. Hərarəti normadan düşən uşaq üşüyür və çox zaman bunu ağlamaqla bildirir, bədəni soyuq olur və dəri rəngi avazıyır, nitqi aydın olmur, baxışı donuq olur:

 

"Bu əlamətlər uşaqda qıcolmanın baş verməsinə bənzəyir, amma qıcolma deyil. Bədəni isitmək üçün ən yaxşı yol dəri-dəriyə təmasdır. Uşaq körpədirsə, onun bədəni ilə təmas üçün ana qucağı kifayət edir. Daha yuxarı yaşlarda olan uşağı isti ədyala bükmək, ayaqlarına istiqac (qrelka) ya isti su doldurulmuş plastik butulka qoymaq, bədəni kamfora yağı ilə ovuşdurmaq lazımdır. Belə olan halda, araq və ya spitrlə ovuşdurmaq olmaz. Bu zaman damarlar genişlənir, əlimizin altında isinmə hiss edirik, amma bədənin olan qalan istiliyi də xaric olur. Ona görə bu üsul hərarətli olan zaman lazımdır. Hərarət olduqda isə əksinə kamfora olmaz. Kamfora yağı tədricən təsir edir, neyroreseptorları qıcıqlandıraraq bədənin tonusunu qaldırır.

 

Uşağa isti maye içirtməyi də unutmuruq. 35 dərəcəyə kimi hərarət enməsi zamanı ilk yardımı göstərib nəzarət edirik. 35-dən aşağı olarsa, təcili yardım xidmətinə müraciət etmək lazımdır".

 

A.İsmayılzadə bildirib ki, normal halda isə yuxu zamanı bədən hərarəti bir dərəcə enə, 35,6 ola bilər. Ona görə üstümüzü örtmək ehtiyacı duyuruq. Körpələrdə isə metabolizm sürətli getdiyindən onlar üstlərini biixtiyar açırlar. Hərarətli virus infeksiyası gunlərindən sonra bu kimi halların baş verməsi normaldır. Çünki hərarət tənzimləyən mərkəz günlərlə virus toksini səbəbindən güclü iş rejimində olur, sonda sanki işi pozulur. Bundan əlavə, uşağa eyni vaxtda verilən müxtəlif hərarətsalıcılar daha mühüm amildir. Son günə kimi 38 dərəcəni gözləmədən dərman vermək də səhvdir.