Aztibb.az xəbər verir ki, Azərbaycan Respublikasının Qida Təhlükəsizliyi Agentliyi (AQTA) ilə “ARB 24” telekanalının birgə layihəsi olan “Qida bələdçisi” verilişinin növbəti buraxılışı yayımlanıb.

 

 

- Respublikamızın ərazisinə keçə biləcək yoluxucu heyvan xəstəliklərindən qorunmaq məqsədilə daha bir neçə ölkədən diri heyvan,heyvan mənşəli məhsulların və xammalın idxalına müvəqqəti məhdudiyyət qoyulub. Belə ki, Ümumdünya Heyvan Sağlamlığı Təşkilatının məlumatına əsasən, Namibiya Respublikasının Zambezi regionunda dabaq xəstəliyi, Estoniya Respublikasının Tartumaa inzibati ərazi vahidində yüksək patogen quş qripi xəstəliyi qeydə alınıb. Bu yoluxucu heyvan xəstəliklərinə qarşı qabaqlayıcı tədbir olaraq Namibiyanın Zambezi regionundan diri heyvanların, heyvan mənşəli məhsulların və xammalın idxalına, o cümlədən tranzit daşınmasına, Estoniyanın Tartumaa inzibati ərazi vahidindən bütün növ diri quş, quş əti və damazlıq yumurtanın idxalına müvəqqəti məhdudiyyət tətbiq olunub.

 

- Ümumdünya Heyvan Sağlamlığı Təşkilatının məlumatına əsasən, İtaliya, Bolqarıstan, Polşa, İngiltərə, Şotlandiya, Uels və Şimali İrlandiyanın bir sıra inzibati ərazi vahidlərində qeydə alınmış yüksək və aşağı patogen quş qripi xəstəliyi aradan qaldırılıb. Həmçinin xəstəliyin ləğv edilməsindən sonra gözləmə müddəti başa çatıb və vilayətlərin epizootik sağlamlıq statusu bərpa olunub. Bununla əlaqədar olaraq sadalanan dövlətlərin məhdudiyyət tətbiq edilən inzibati ərazi vahidlərindən bütün növ diri quş, quş əti, quşçuluq məhsullarının və damazlıq yumurtanın ölkəmizə idxalı ilə bağlı tətbiq edilmiş məhdudiyyət aradan qaldırılıb.

 

- Dönər biznesi ilə məşğul olan qida obyektlərinin sağlamlaşdırılması ilə bağlı layihə davam edir. Layihə çərçivəsində ilkin olaraq paytaxtda 10, bölgələrdə də 10 obyekt olmaqla, ümumilikdə 20 dönər biznesi ilə məşğul olan müəssisənin sağlamlaşdırılması nəzərdə tutulur.

 

- İrandan ölkəmizə idxal olunan 64 tondan çox istifadəyə yararsız kartof məhsulu geri qaytarılıb. Məhsulda karantin tətbiq edilən orqanizm - kartofun qonur çürüməsi aşkarlanıb.

 

- Rusiyadan ölkəmizə idxal olunan kartof məhsulu partiyasında da karantin əhəmiyyətli zərərli orqanizm aşkarlandığından Cəlilabad poliqonunda məhv edilib.

 

- Fındıq məhsulunun keyfiyyətinə və təhlükəsizliyinə ciddi təsir edən amillərdən biri də aflatoksinin yaranmasıdır. Fındıqda aflatoksin məhsulun düzgün şəkildə qurudulmaması, uzun müddət torpağın üzərində qalması, qurudulduqdan sonra torpaq, yarpaq, ot kimi yad cisimlərdən təmizlənməməsi, kisələrə qaydalara uyğun yığılmaması və düzgün şəraitdə saxlanılmaması zamanı yaranır. Bu toksinin miqdarı normadan yüksək olduqda insan sağlamlığı üçün xüsusi təhlükə mənbəyinə çevrilir.

 

- Ölkədə qida təhlükəsizliyinin təmin olunmasında, rəqabətqabiliyyətli məhsulların ixrac potensialının artırılması və genişləndirilməsi baxımından laboratoriya sisteminin inkişafı, modernləşdirilməsi, beynəlxalq tələblərə uyğunlaşdırılması müstəsna əhəmiyyətə malikdir. Qonağımız “Analitik Ekspertiza Mərkəzi” departamentinin müdiri Fərid Əliyev AQTİ-nin nəzdində fəaliyyət göstərən laboratoriyaların maddi-texniki bazası, kadr potensialı, eləcə də beynəlxalq təşkilatlar, xarici laboratoriyalarla əlaqələri, əməkdaşlığı barəsində ətraflı məlumat verib.

 

- Yeməklərin hazırlanmasında yağların rolu böyükdür. Qidalara ləzzət, dad qatan əsas nemətlərdən biridir. Təəssüf ki, bəzən yağlardan təkrar-təkrar istifadə edilərək də yeməklər hazırlanır. Bu da onun tərkibinin dəyişməsinə səbəb olur, orqanizmi bir çox problemlərlə üz-üzə qoyur. “AQTA maarifləndirir” rubrikasında diyetoloq Emil Hidayətli və AQTİ-nin mütəxəssisi Xədicə Doldolova yağlardan dəfələrlə istifadənin orqanizmə təsirindən geniş bəhs edib.

 

Qeyd edək ki, “Qida bələdçisi” hər həftənin bazar günü saat 19:20-də "ARB 24" telekanalında yayımlanır.