Pandemiya dövründə bir çoxumuz evdən çalışmaq məcburiyyətindəyik. Bəs evimiz, ofisimizdirsə sağlamlığı və fit qalmağı necə təmin edək?
Xüsusilə də şəkərli diabeti, yüksək təzyiqi olanlar qidalanmalarına necə diqqət etməlidirlər?
Aztibb.az xəbər verir ki, endokrinoloq Fərhad Burzu evdən işləyənlər üçün sağlam qidalanma qaydalarını təqdim edib:
Mətbəxdə işləməyin.
Mətbəxdə olmanız, qeyri-yemək saatlarında, ac olmasanız belə, tez-tez atışdırmalıqlar yeməyinizə səbəb olacaq. Kompüterinizi evin daha sakit bir güşəsində quraşdırmanız daha məqsədəuyğundur.
Yemək saatlarınızı təyin edin.
Əsas yemək və atışdırmalıqlar, çay vaxtlarınız. Bu zaman daha planlı çalışacaqsınız və yeməyə müəyyən olunmuş vaxtdan çox vaxt sərf etməyəcəksiniz.
Yemək yeməyi unutmayın.
Başınızı işinizə qatıb, yemək vaxtını ötürməyin. İşiniz çoxdursa, saatı yemək vaxtına qurun, və qidalanın.
Yeməkləri əvvəlcədən hazırlayın.
Sanki ofisdə çalışdığınız günlərdəki kimi, yeməkləri əvvəlcədən hazırlayın və bu sizin iş saatlarında vaxtınıza qənaət rtməyinizə səbəb olacaq. Hazır doğranmış tərəvəz salatı, sobada toyuq və s.
Sağlam qidalanmaya üstünlük verin.
Qidalanmanızın balanslaşdırılmış olması sağlamlığınız üçün çox vacibdir. Ət, balıq, doymamış yağlar, lifli ərzaqlar, mövsüm tərəvəzləri və meyvələrinə üstünlük verin.
Gün ərzində yetərincə su için.
Gündəlik su norması, çəkinizə görə, hər 1 kq-30 ml sudur. Şirin və qazlı içkilərdən uzaq durun.
Kofein qəbuluna diqqət.
Gün ərzində qəhvəni 2 fincandan artıq içməyiniz sağlamlığınız üçün zərərli ola bilər.
Evinizə zərərli atışdırmalıqlar (çips, kreyker, şirin peçenye və s. ) almayın.
Bu məhsullar evdə olduğu müddətcə, xüsusilə kompüter arxasında, yeməyə can atacaqsınız.
Yemək yediyinizdə çalışmayın.
Bu, doyma hissinizə mənfi təsir edəcək. Yemək porsiyanız bitsə belə, siz hələ də doymadığınızı düşünəcəksiniz.
Yemək porsiyalarınızı düzgün təyin edin.
Həddindən çox yeməyin, yeməkdən öncə atışdırmayın. Boşqabınızda daha çox tərəvəz, 100-150 qr ət , balıq və s., bunlardan daha az isə makaron, qreçka və s. olsun.
