Aztibb.az xəbər verir ki, Azərbaycan Respublikasının Qida Təhlükəsizliyi Agentliyi (AQTA) ilə “ARB 24” telekanalının birgə layihəsi olan “Qida bələdçisi” verilişinin növbəti buraxılışı yayımlanıb.

 

Budəfəki buraxılışda da aktual və maraqlı mövzulara toxunulub:

 

- Ötən həftə də ölkə ərazisində qanunvericiliyin tələbləri çərçivəsində qida təhlükəsizliyinin təmin edilməsi, istehlakçı hüquqlarının müdafiəsi sahəsində tədbirlər davam etdirilib. Belə ki, AQTA əməkdaşları tərəfindən Bakı şəhəri, Sabunçu rayonu, Ramana qəsəbəsi, Südçülük Sovxozunda fəaliyyət göstərən fiziki şəxs Axundzadə Rasim Elmar oğluna məxsus quş əti emalı müəssisəsində keçirilən yoxlama zamanı qida təhlükəsizliyi sahəsində sanitariya-epidemioloji qaydalara və normativlərə əməl olunmadığı müəyyən olunub. Sumqayıt şəhəri, Energetik qəsəbəsi 9 ünvanında fəaliyyət göstərən Namazov Ruslan Rza oğluna məxsus çörək istehsalı müəssisəsində də yoxlama keçirilib. Yoxlama zamanı müəssisənin qida təhlükəsizliyi qeydiyyatından keçmədən fəaliyyət göstərdiyi, normativ hüquqi aktların, sanitariya-gigiyena qaydalarının tələblərinin kobud şəkildə pozulduğu aşkar edilib. Aşkar edilmiş nöqsanlarla bağlı müəssisənin rəhbərliyi inzibati məsuliyyətə cəlb edilib, müəssisəsinin fəaliyyəti məhdudlaşdırılıb. Qida təhlükəsizliyinin təmin edilməsi, istehlakçı hüquqlarının müdafiəsi sahəsində bölgələrdə də aşkarlanmış qanunsuz hallarla bağlı müvafiq tədbirlər görülüb.

 

- Artıq göbələk mövsümü başlayıb. Dadına və tərkibindəki vitaminlərin zənginliyinə görə fərqlənən, çox sevilən göbələk düzgün seçilməyəndə və emal olunmayanda zəhərlənməyə, hətta ölümə belə səbəb ola bilir. Bəs, zəhərli və yeməli göbələyi hansı xüsusiyyətinə görə ayırd edə bilərik? AQTİ-nin mütəxəssisi Aysel Məmmədova və göbələk həvəskarı Yaşar Şirinov göbələyin həm faydasından, həm də səbəb ola biləcəyi təhlükəli xüsusiyyətindən ətraflı bəhs edib.

 

- AQTA tərəfindən əhalinin sağlamlığının qorunması və təhlükəsiz qida məhsulları ilə təmin olunması istiqamətində nəzarət tədbirləri davam etdirilir. “Sun Food” MMC tərəfindən istehlaka yararsız və istifadə müddəti bitmiş qida məhsullarının məhv edilməsi ilə bağlı Agentliyə edilmiş müraciət əsasında həmin şirkət tərəfindən istehsal olunmuş, istifadə müddəti bitmiş və istehlaka yararsız 34,535.6 kq müxtəlif növ qida məhsulu “Təmiz Sumqayıt-Kənan” MMC-yə məxsus tullantıların zərərsizləşdirilməsi poliqonunda Agentlik əməkdaşlarının iştirakı ilə məhv edilib.

 

- BFMQƏ-lərin idxalına nəzarət gücləndirilib. 2021-ci ilin yanvar-oktyabr ayları ərzində ölkəyə idxal edilmiş bir sıra bioloji fəallığa malik qida əlavələrinə keçirilən baxış zamanı uyğunsuzluq aşkar edilib. Uyğunsuzluq aşkar edilmiş məhsul partiyalarının istehlaka yararsız olması ilə bağlı qərar qəbul edilib və qanunvericiliyin tələbi çərçivəsində müvafiq tədbirlər görülüb.

 

- Ölkəyə gətirilən bioloji fəallığa malik qida əlavələrinin idxalı və satışı prosesi mövcud qanunvericiliyin tələbi çərçivəsində təmin edilməlidir. Bu sahədə fəaliyyət göstərən sahibkarlıq subyektlərinin əməl etməsi zəruri olan tələblər barəsində qonağımız AQTA-nın şöbə müdiri Ramazan Nəbiyev geniş məlumat verib.

 

- İxracyönümlü məhsullar sırasında nar xüsusi yer tutur. Nar Azərbaycanın demək olar ki, bütün bölgələrində becərilir. Qiymətli, eləcə də iqtisadi cəhətdən olduqca əhəmiyyətli subtropik bitkidir. Lakin düzgün qulluq edilməyəndə xəstəlik və zərərvericilər məhsuldarlığa və keyfiyyətə əhəmiyyətli dərəcədə təsir göstərir, əmtəəlik dəyərini aşağı salır. “AQTA maarifləndirir” rubrikasında AQTA-nın Ucar Regional Bölməsinin sektor müdiri Yusif Ələkbərov, sahibkar Əli Bayramov və AQTİ-nin mütəxəssisi Bürhanə Mürşüdova nara ziyan vuran zərərli orqanizmlərə qarşı effektiv mübarizə tədbirləri ilə bağlı tövsiyələrini bölüşüblər.

 

Qeyd edək ki, “Qida bələdçisi” hər həftənin bazar günü saat 19:20-də "ARB 24" telekanalında yayımlanır.