Reyhan bitkisi çox qədim zamanlardan bəri tibbi məqsədlərlə istifadə edilir. Çox hallarda göyərti kimi salatların, yeməklərin tərkibinə vurulan bu bitki ədviyyat olmaqla yanaşı, həm də bir çox dərdin dərmanıdır.

Reyhan - dodaqçiçəklilər fəsiləsindən bir illik bitki cinsidir. Vətəni Hindistan və İrandır. Cənubi Avropanın bütün ölkələrində becərilir.

Bu bitkinin yarpaqlarında efir yağı, azotlu maddə, yağ, sellüloza, vitaminlər, boya maddələri və s. var. Yarpaqlarında olan boya maddələri (məsələn, xlorofil, flavon, karotin) tibbi cəhətdən faydalıdır. Qida ilə qəbul olunmuş reyhan maddələr mübadiləsini yaxşılaşdırır , həzmi asanlaşdırır və mədə-bağırsaq sistemini nizamlayır.

Aztibb.az saytı reyhanın faydalarını sadalayır:

• Bağırsaqdakı parazitləri atır. Həzm sistemi xəstəliklərində olduqca təsirli olan reyhan yarpağı, gündə iki dənə yeyildikdə bağırsaqdakı parazitləri təmizləyir, maddələr mübadiləsini yaxşılaşdırır, həzmi asanlaşdırır.

• İmmuniteti gücləndirir. Antibakterial tərkibi sayəsində immuniteti gücləndirici təsiri var.

• Şişkinliyi azaldır. Gündə iki yarpaq yeyilən reyhan bədəndəki şişliyi atmağa kömək edir.

• Depressiyadan qoruyur. Reyhan anti-depressiya təsiri edir və insanı sakitləşdirir.

• Bronxları yumşaldır. Bu bitki bronxları yumşaldaraq, öskürəyin azalmasına kömək edir. Eyni zamanda, ağciyərləri təmizləmə xüsusiyyətinə də malikdir.

• Xərçəngin qarşısını alır. Tərkibindəki flavon və taninlər sayəsində xərçəngdən qoruyur.