Koronavirusun dünya üzrə statistikasına (223 ölkə) nəzər salsaq, görərik ki, vəziyyət heç də ürəkaçan deyil. 2021-ci il 19 oktyabr tarixinə olan məlumata görə, dünya üzrə cəmi yoluxanların sayı 242,125,591 nəfər, yeni yoluxanların sayı 246,068, cəmi ölənlərin sayı 4,924,573 olmuşdur. Yeni ölənlərin sayı 4,073, ölüm faizi 2,03-dür. COVID-19 yenidən aktivləşib və dünyanı ölüm saçan təhlükəsi ilə qarış-qarış gəzməkdə davam edir. Bəzi yerlərdə artıq 5-ci dalğanın gəlişi haqqında faktlar var.

 

Gürcüstan Xəstəliklərə Nəzarət Milli Mərkəzinin rəhbəri Amiran Gamkrelidzenin sözlərinə görə, ölkədə yoluxanların sayı ciddi şəkildə artıb ki, bu da 5-ci dalğanın başlanğıcıdır. Onun sözlərinə görə, yalnız peyvənd epidemiyanı dayandıra bilər. O, əhaliyə müraciət edərək, hər kəsi vaksinasiya olunmağa çağırıb. Qonşu ölkədə - Gürcüstanda koronavirusun 5-ci dalğası başlayıbsa, Azərbaycanda da onu qarşılamağa hazır olmalıyıq.

 

Aztibb.az xəbər verir ki, “Həkim məsləhəti” rubrikasında Mərkəzi Gömrük Hospitalının Poliklinika rəisi, kardioloq Tamilla Əliyeva “COVID-19-un 5-ci dalğası gələrsə, onu necə qarşılamalıyıq?” sualını cavablandırıb.

 

Onun sözlərinə görə, COVID-19 xəstəliyinin artmasına həmçinin, payız-qış mövsümünün başlanması, respirator və infeksion xəstəliklərin artması da ciddi təsir göstərir. Məktəblərin və iri ticarət mərkəzlərinin açılmasını, kütləvi tədbirlərin keçirilməsini nəzərə alsaq, koronavirusun artma səbəblərinin də artdığını bununla izah edə bilərik. Artıq bir neçə gündür ki, orta məktəblərdə və iki ali təhsil müəssisəsində uşaqlar və tələbələr arasında COVID-19 xəstəliyinə yoluxanlar və dünyasını dəyişənlər də var. Bununla əlaqədar olaraq Bakı və Sumqayıt şəhərlərində bəzi təhsil müəssisələri onlayn tədrisə keçib.

 

"Hələ 2019-cu ilin sonlarından həyatımıza daxil olan və həyat tərzimizi dəyişən COVID-19-a qarşı mübarizə tədbirləri eynidir. Sanitar-gigiyenik qaydalara riayət etmək və vaksinasiya hələlik koronavirusdan yeganə müdafiə vasitəsidir.