Dərinin müayinəsi üsulu olan dermatoskopiya həkim dermatoloq tərəfindən dermatoskop adlanan cihaz vasitəsilə aparılır. Bu zaman dəriyə xüsusi məhlul və ya gel çəkilir, sonra aparatla həmin nahiyyəyə baxılır. Dermatoskopiya ilə dəridə olan bütün elementləri izləmək mümkündür.

Bu barədə Aztibb.az-a həkim-dermatoloq Şahin Bədəlov məlumat verib. 

Onun sözlərinə görə, klassik dermatoskopiya dəridə olan bəd və ya xoşxassəli törəmələrin, xalların müayinəsindən ibarətdir. Həmçinin dermatoskopla tüklərdə və tük dibində olan dəyişiklikləri (trixoskopiya), dərinin iltihab xəstəliklərini (inflamoskopiya), dərinin parazitar xəstəliklərini (entomodermatoskopiya), dəri kapilyarlarını (kapilaroskopiya), sinir mənşəli dəri xəstəliklərini (psixodermatoskopiya), dəri prosedurlarının sonrakı effektivliyinin qiymətləndirilməsini və s. müayinə etmək olur.

"Ən asası, dermatoskopiya vasitəsilə dəri xərçəngini çox ilkin mərhələdə aşkar edərək insanların həyatını qurtarmaq mümkündür. Bütün dəri elementləri (xal, bazalioma, yasti hüceyrəli dəri xərçəngi, ziyil, papillomlar, keratoakantomalar, seboreya keratozları və s.) hər hansı bir üsul ilə (lazer, koaqulyator, plazma, cərrahi və s.) götürülməzdən əvvəl mütləq dermatoskopiya olunmalıdır", - deyə həkim bildirib.