Əsəbi uşaq anlayışı yoxdur, əsəbi valideyn var. Sadəcə, uşaqlarda normal inkişaf mərhələlərində keçici olaraq yaş sindromları olur. Məsələn, 2 yaş sindromu keçirən uşaqlar daim "yox" sözünü işlədir, hər şeyin onun istədiyi kimi olmasını tələb edir. İstədiyi olmadıqda başını divara vurur, özünü yerə çırpır, bütün günü ağlayır və s.
Aztibb.az xəbər verir ki, həkim-pediatr Günay Rəsulova bildirib ki, belə olan halda valideyn həkimə müraciət edərək "övladım əsəbidir" deyir. Hətta bəzən həkimlə məsləhətləşmədən aptekdən müəyyən "sakitləşdirici" dərmanlar alıb uşağa verir. Belə olan halda uşağın sürətlə inkişaf edən beyni tormozlanır.
G.Rəsulova qedy edib ki, bu, tamamilə yanlışdır. Uşaqlara yerli-yersiz, lazımsız dərmanların verilməsi onlarda gələcəkdə yaddaş zəifliyi, diqqətsizlik kimi problemlərin ortaya çıxmasına səbəb olur.
"Uşaqlarla gərgin, hövsələsiz, emosional və aqressiv davranmayın", - deyə həkim valideynlərə övladları ilə münasibətdə diqqətli olmağı tövsiyə edib.