Artroz oynaqların qığırdaq səthinin zədələnməsi, aşılanması, xalq dilində desək, oynaqların duzlaşması ilə müşayiət olunur. Hərəkətsiz, adinamik həyat tərzi, artıq çəki problemləri, yanlış qidalanma və s. artroz xəstəliklərinin artmasına gətirib çıxarır.
Aztibb.az-ın xəbərinə görə, Mərkəzi Gömrük Hospitalının travmatoloqu Müseyib Əhmədov AZTV-də "Səhər" proqramının "Sağlam ol" rubrikasında "Artroz xəstəliyi nədir və müalicəsi necə aparılır?" sualını cavablandırıb.
Həkim müsahibəsində artroz xəstəliyinin patogenezində əlavə yüklənmə, oynaq qığırdaqlarının vaxtından əvvəl yeyilməsinin müşahidə olunduğunu deyib. Bildirib ki, artrozların əsasən 4 dərəcəsi var: I, II və müəyyən qədər III dərəcəli xəstələrin konservativ müalicəsini aparmaq mümkündür. Buraya ağrıkəsicilərdən istifadə, reabilitasiyalar, fizioterapiyalar, oynaqdaxili müdaxilələr və s. daxildir. Oynaqdaxili müdaxilələr dedikdə, qığırdaqqoruyucu preparatların yeridilməsi və s. prosedurlar problemi müəyyən qədər aradan qaldıra bilir.
"3-cü dərəcənin son mərhələsi, IV dərəcə artrozlarda isə oynaqların dəyişdirilməsi (endoprotezləşdirmə əməliyyatı) qaçılmaz olur", - deyə travmotoloq əlavə edib.
