Aztibb.az xəbər verir ki, ürək-damar cərrahiyyə uzmanı Cabir Gülmalıyev infarktın xəstəxana şəraitində diaqnozu və müalicəsi haqqında məlumat paylaşıb.

 

Həkim qeyd edib ki, əvvəllər xəstələrdə damarı açmadan, dərmanlarla müalicə təyin edilirdi. Preparatlarla (trombolitik) damar tıxanıqlığı əridilməyə çalışılırdı:

 

"Angioqrafiya ilə xəstənin infarkta səbəb olan tıxanmış damarı müəyyənləşdirilir və o damar açılır. Damar açıldıqdan sonra oraya stent implantasiyası edilir. İnfarkta səbəb olan damar açıldıqdan sonra xəstəyə artıq digər dərman preparatları (qansulandırıcı, nitroqliserin, xolesterin, aritmiya əleyhinə, qan təzyiqini və nəbzi aşağı salmaq üçün dərman preparatları) təyin olunur.

 

Bypass əməliyyatı ilə isə bədənin qol, ayaq kimi digər nahiyələrindən alınan damarlar, tıxanmış ürək damarlarına təkrar qan axımını təmin etmək üçün istifadə edilir. Nəticədə bu damarların qidalandırdığı miokard infarktı olan hissələrə lazımınca qan axımı təmin olunur".