Mayo Klinikasının həkimləri potensial olaraq insan ömrünün müddətinin azalmasına səbəb olan məhsulları açıqlayıblar.

Aztibb.az medikforum.ru-ya istinadən xəbər verir ki, klinikanın diyetoloqu Liza Torborqun tövsiyəsinə əsasən, rasiondan emal edilmiş komponentlərdən ibarət məhsulları çıxarmaq lazımdır. Kolbasa kimi tərkibində doymuş piylər və duzlar olan məmulatlar siyahıda ilk sıralardadır. Mütəxəssisin sözlərinə görə, məhz belə qidalar erkən ölüm riskinin artmasına imkan yaradır.

"Tədqiqatlardan birində qırmızı ətin müntəzəm istifadəsi və ürək-damar sistemi, onkoloji, xüsusən qalın bağırsaq xərçəngi xəstəlikləri riskinin artması arasında əlaqə müəyyən edilib ", - deyə L.Torborq xəbərdarlıq edib.

Bundan başqa, klinikanın kardioloqu Stefen Kopeski bildirib ki, şəkər ehtiva edən məhsulların, həmçinin qızardılmış yeməklərin həddən artıq istifadəsi ürək, damar və diabet xəstəliklərinin inkişafı ehtimalını yüksəldir və insan ömrünün müddətinə təsir edir.