Aztibb.az xəbər verir ki, bu barədə ürək-damar cərrahiyyə uzmanı Cabir Gülmalıyev məlumat paylaşıb.

 

Cərrah bildirib ki, ASD, yəni qulaqcıqlararası çəpərin qüsuru zamanı sağ qulaqcıqda və ağciyərlərdə təzyiq böyük qan dövranından aşağı olduğundan qan (arterial) soldan sağa atılır. Buna adətən sol-sağ şunt deyilir. Ağciyərlərdə damar sisteminin zədələnməsi nəticəsində təzyiqin artması, sonradan venoz qanın qüsur vasitəsilə sağdan sola atılması ilə sağ-sol şunt baş verir. Nəticədə siyanoz (göyərmələr) meydana gəlir. Əgər qüsurdan keçən qan miqdarı müəyyən həddən çoxdursa defekt bağlanmalıdır. Əks halda bu, gələcəkdə ürək çatışmazlığı kimi fəsadlara səbəb ola bilər.

 

Onun sözlərinə görə, qulaqcıqlararası çəpər qüsurlarının müalicəsi yalnız cərrahi yolla aparılır. Bu zaman çəpərin qüsur hissəsinə tikiş və ya mümkün olmadıqda yamaq (auto - ya kseno perikard vasitəsilə, ya da dakron materialından) qoyulur.

 

- Defektin quruluşu imkan verərsə, dəlik əməliyyatsız yolla (transkateter yolla) bağlanıla bilər.

- ASD günümüzdə minimal invaziv metodla qoltuqaltından 3-4 sm-lik kəsiklə cərrahi olaraq təmir edilir.