Azərbaycan Tibb Universitetinin (ATU) rektoru, professor Gəray Gəraybəyli İstinye Universitetinin rektoru, professor Erdal Karaözün rəhbərlik etdiyi nümayəndə heyəti ilə görüşüb.

 

Aztibb.az xəbər verir ki, görüşdə professor Gəray Gəraybəyli Türkiyə-Azərbaycan birliyinin tarixi köklərə malik olduğunu vurğulayıb, ATU-nun beynəlxalq əməkdaşlıq layihələrində Türkiyənin önəmli yer tutduğunu bildirib. Qeyd edib ki, ATU Türkiyənin bir çox universitetləri ilə əməkdaşlıq edir, müxtəlif istiqamətlərdə ortaq layihələr icra olunur. Rektor ikili diplom proqramının icrası, həmçinin tədris proqramındakı dəyişikliklər barədə də qonaqlara məlumat verib.

 

Daha sonra İstinye Universitetinin rektoru, professor Erdal Karaöz çıxış edərək Azərbaycan və Türkiyə qardaşlığının əbədi olduğunu qeyd edib. O, bu birliyin təhsil və tibb sahəsində də yüksələn xətlə davam etdiyini söyləyib. E.Karaöz bildirib ki, İstinye Universiteti 2015-ci ildə “21-ci Yüzyıl Anadolu” Vəqfi tərəfindən yaradılıb. Universitet 9 fakültə, 2 kollec və 3 institutu özündə birləşdirir.

 

Görüşdə iki ölkənin ali təhsil müəssisələri arasında müəllim-tələbə mübadiləsi, elm, tədris və digər sahələr üzrə əməkdaşlıq istiqamətində fikir mübadiləsi aparılıb, perspektivlər müzakirə olunub.

 

Sonda Azərbaycan Tibb Universiteti ilə İstinye Universiteti arasında əməkdaşlığa dair müqavilə imzalanıb.

 

Görüşdə ATU-nun beynəlxalq əlaqələr üzrə prorektoru, dosent Orxan İsayev, LIV Hospitalının Azərbaycan üzrə koordinatoru Afaq Əliyeva da iştirak ediblər.