Çəkisi 175,5 kq, boyu isə 165 sm olan, kəskin daşlı xolesistit, öd kisəsinin hidropsu və kəskin ağrı şikayətləri olan, eyni zamanda Fil xəstəliyindən əziyyət çəkən xəstə Mərkəzi Gömrük Hospitalının Cərrahiyyə və orqan transplantasiyası şöbəsinin müdiri, tibb üzrə fəlsəfə doktoru Mircəlal Kazımi tərəfindən əməliyyat olunub.

 

Aztibb.az xəbər verir ki, bu barədə M.Kazımi sosial şəbəkədə məlumat verib.

 

Həkim bildirib ki, Fil xəstəliyi və ya elefantiaz digər adı ilə limfa ödem - filarioidea ailəsinə daxil olan qurdlar tərəfindən törədilən parazitar xəstəlikdir. Bu parazit əsasən limfatik sistemi zədəliyir və onların normadan artıq böyüməsinə gətirib çıxarır. Hipertrofiyaya uğramış ayaqlar, əllər, sinə və cinsiyyət orqanları, bu xəstəliyin ümumi simptomlarından sayılır. İnfeksiyanın ən ümumi görülən əlamətləri isə həddindən artıq dərəcədə böyümüş qollar, ayaqlar, genitaliya və sinələrdir. Müxtəlif müalicə üsulları təklif olunsa da, əksər hallarda müalicəsi həyatı boyu davam edir.

 

"Təcrübəli anestezi və reanimasyon komandamızın köməyi ilə xəstədə laparoskopik (qapalı üsulla)  xolesistektomiya əməliyyatını uğurla icra etdik. Artıq xəstə sağlam şəkildə evindədir", - deyə M.Kazımi qeyd edib.