Avqustun 26-da Əməkdar elm xadimi, “Şöhrət” ordeni laureatı, Azərbaycan Tibb Universitetinin (ATU) II Mamalıq və ginekologiya şöbəsinin əməkdaşı, tibb elmləri doktoru, professor Naziya Şəmsəddinskaya ömrünün 94-cü ilində vəfat edib.

Respublikamızda elmin inkişafına mühüm töhfələr vermiş N.Şəmsəddinskaya 30 ildən artıq müddətdə ATU-nun Mamalıq və ginekologiya kafedrasına rəhbərlik edib. Çoxşaxəli fəaliyyəti ilə o, tibbin müxtəlif sahələrinin yeni biliklərlə zənginləşməsində mühüm rol oynayıb. Alim 200-dən çox elmi tədqiqatın, eləcə də bir sıra monoqrafiyaların müəllifi olub.

Yüksəkixtisaslı tibbi kadrların və gənc alimlərin yetişdirilməsində böyük xidmətləri olan N.Şəmsəddinskayanın rəhbərliyi ilə 40 elmlər namizədi, 3 elmləri doktoru hazırlayıb. Çoxsaylı beynəlxalq konqreslərdə iştirak edən professor fəaliyyəti boyunca Azərbaycan elmini xarici ölkələrdə layiqincə təmsil edib.

N.Şəmsəddinskaya on illərlə Azərbaycan və rus dillərində mühazirələr söyləyib, Ş.M.Ələsgərova adına 5 saylı kliniki doğum evinin, 1 və 5 saylı qadın məsləhətxanasının konsultantı olub, xəstələrə yüksəkixtisaslı cərrahi və təcili yardım xidmətləri göstərib.

Elmi, pedaqoji və əkim fəaliyyəti ilə yanaşı, Naziya Şəmsəddinskaya ictimai fəaliyyətlə də məşğul olub. O, Səhiyyə Nazirliyinin Attestasiya komissiyasının üzvü, həmçinin Respublika Mama-ginekoloqların Elmi Cəmiyyətinin idarə heyətinin sədr müavini olub.

Alimin Azərbaycanda tibb elminin inkişafındakı xidmətləri dövlətimiz tərəfindən yüksək qiymətləndirilib. O, bir çox mükafatlara, eləcə də "Əməkdar elm xadimi" fəxri adına layiq görülüb, "Şöhrət" ordeni ilə təltif edilib.

İstedadlı həkim Naziya Şəmsəddinskayanın xatirəsi onu tanıyanların qəlbində daim yaşayacaq.

Allah rəhmət eləsin!