Mərkəzi Gömrük Hospitalının invaziv-kardioloqu Samir Mustafayev “Facebook” sosial şəbəkəsində “Həkim məsləhəti” rubrikasında ürək sağlamlığının qorunmasında qidalanma tərzinin rolu barədə mühüm tövsiyələr verib.

Kardioloq bildirib ki, düzgün qidalanma ürəyin sağlam olmasında çox vacib rol oynayır. Ürək üçün faydalı olan dərmanlardan əlavə, digər yanaşmalar da var ki, buraya idman və pəhriz daxildir:

“Həftədə minimum 150 dəqiqə sürətli templə gəzmək kifayətdir. Həftədə 75 dəqiqə, yaxud da 5 gün ərzində 30 dəqiqə idmanla məşğul olmaq və bunu həyat tərzinə çevirmək lazımdır. Ürək-damar xəstələri əsasən meyvə və tərəvəzlərə üstünlük verməli, qırmızı əti mümkün qədər azaltmalıdır”.

S.Mustafayev iki qidalanma tərzini xüsusilə vurğulayaraq qeyd edib ki, ilk növbədə, duzun miqdarını azaltmaq lazımdır. Çünki duz təzyiqin yüksəlməsinə yol açır, bu isə ürək çatışmazlığına, infarkta və qəfil ölümə səbəb ola bilər. Duzdan nə qədər az istifadə olunsa, ürək bir o qədər sağlam işləyəcək.

Digər vacib məqam isə yağsız yeməklərdir. İnsanlar əsasən yağlı və qızartma yeməklərdən uzaq durmalıdır. Yağlı yeməklər damar divarlarında yağ lövhələrinin meydana gəlməsinə səbəb olur ki, bu da gələcəkdə infarkt və insultun yaranma riskini artırır. Qırmızı ət və ya digər qidalar yeyərkən, qızartmaq əvəzinə qaynatmaq və ya sobada bişirmək məsləhət görülür.