İslam Dünyası Elm, Təhsil və Mədəniyyət Təşkilatının (ICESCO) elan etdiyi “Qadın ili” çərçivəsində qadın həkimlər üçün süni intellektə dair beynəlxalq seminar keçirilib.

Aztibb.az xəbər verir ki, təşkilatın baş ofisindən bildiriblər ki, Euromed Universiteti ilə birgə “Qadın həkimlər üçün süni intellektə giriş” mövzusunda təşkil olunmuş tədbirdə yeni texnologiyalar dövründə süni intellektin tibb elmində tətbiqi, bu sahədə nəzəri biliklər və praktik məsələlər, müxtəlif modullar üzrə məruzələr təqdim olunub. ICESCO-nun Yüksək Texnologiyalar Mərkəzinin direktoru Kais Həmmami çıxışında bildirib ki, təşkilatın ekspertləri və müxtəlif elm mərkəzlərinin mütəxəssisləri islam ölkələrindəki qadın həkimlərin süni intellektə dair biliklərini artırmaq məqsədilə keçiriləcək silsilə seminar və konfranslarda texnologiyanın bu sahədə ən son nailiyyətlərini təqdim edəcəklər. O əlavə edib ki, artıq bütün sahələrdə, o cümlədən tibb elmində qlobal texnoloji inqilab baş verir və üzv ölkələrdən olan həkimlər bu prosesdə fəal iştirak etməlidirlər.

Qadın həkimlər üçün keçirilən ilk seminarda iştirakçılar arasında interaktiv müzakirələr aparılıb, süni intellektə dair videomateriallar nümayiş etdirilib.