Həkim bildirib ki, pandemiya dövründə səyahətlər əvvəlki dövrlərə nisbətən daha ətraflı və ehtiyatlı yanaşma tələb edir. Burada əsas məqsəd qarşılaşdığımız təhlükələri, riskləri minimuma endirməkdir. Bunun üçün bəzi məqamları nəzərə almaq vacibdir. Əvvəla, gedəcəyiniz ölkədə COVID-19-un yayılma dinamikası ilə tanış olmaq lazımdır. İkincisi, səyahətə çıxmağı planlaşdırdığınız dostlarınızın və qohumlarınızın peyvənd olunub-olmaması ilə maraqlanmalı, onların risk qrupuna daxil olmadığına əmin olmalısınız.

 

Üçüncüsü, səyahətin hansı nəqliyyat vasitəsi ilə həyata keçiriləcəyi barədə qərar verərkən bütün gigiyena qaydalarına riayət etməniz mütləqdir.

 

Əgər səyahətə avtomobillə çıxırsınızsa, deməli, yol yoldaşlarınız ən yaxın adamlardır. Bunlar ailə üzvləri, dostlar, qohumlar ola bilər. Hələlik, avtomobillə səyahət digər nəqliyyat vasitələrindən daha təhlükəsiz marşrutdur. Avtomobillə səyahətə çıxarkən mikroblardan qorunmağın ən yaxşı yolu maşının salonunun təmizlənməsi və dezinfeksiyasıdır. Maşında mütləq antibakterial salfetlər və əllər üçün dezinfeksiyaedici vasitələr saxlayın. Belə ki, hər dayanacaqda sabunla su və dezinfektant olmur. Yol boyu maşının pəncərələrini açıq saxlayın ki, təmiz hava ilə nəfəs alasınız. Hava həddən artıq istidirsə, kondisionerdən istifadə edin.

 

Təyyarə ilə səyahətə başlayarkən qeydiyyat terminallarından tutmuş təyyarənin salonuna qədər bütün gigiyenik qaydalara riayət etməniz mütləqdir. Bu yerlərdə də tibbi maska, dezinfektantdan istifadə və sosial məsafənin saxlanması vacibdir. Hazırda bir çox aviaşirkətlərin təyyarələrində tibbi maskalar və antibakterial salfetlər paylanır.

 

Təyyarədə avtomobilə nisbətən daha çox insanın cəmləşdiyini nəzərə alaraq, burada daha ehtiyatlı olmaq lazımdır. Çünki, siz əvvəlcədən kimin yanında əyləşəcəyinizi heç vaxt bilmirsiniz. Piyada səyahətlər zamanı isə təhlükəsizliyiniz yol yoldaşlarından çox asılıdır. Əgər yanınızda yoluxma riskinə daha çox məruz qalan insanlar varsa, siz həm özünüzü, həm də onları təhlükədən qorumağa çalışmalısınız. Burada da virusdan qorunmağın qızıl qaydaları öndədir.

 

Ümumiyyətlə, nəqliyyat vasitəsindən asılı olmayaraq, hansı ölkəyə səyahət edirsinizsə, daha çox təbiət qoynunda olmağa çalışın. Müasir hotellər kirayəyə götürəcəyiniz evlərdən daha etibarlıdır, belə ki, vaxtı-vaxtında dezinfeksiya olunur. Bağlı məkanlara getməyə çox da cəhd etməyin. Koronavirus təhlükəsi qaldıqca, həyat tərzinizi də ona uyğun dəyişin və reallıqla barışın – bu, müvəqqəti çətinlikdir və bəşəriyyət ona tezliklə qalib gələcək.