Yeni növ koronavirus (COVID-19) infeksiyası əleyhinə istifadə edilən peyvəndlərə qarşı əks-göstəriş sertifikatı almaq istəyənlər xəstəlikləri barədə əsaslı sənədləri (həkim rəyi, aparılmış müayinələrin nəticələri) müvafiq komissiyaya təqdim etməlidirlər. Mütəxəssislər həmin göstəriciləri yoxladıqdan sonra sənədin əsaslı olub-olmadığına qərar verirlər. Əgər müraciət edən xəstəliyin kəskin dövrünü yaşayır və xəstəlik tez-tez təkrarlanırsa həmin xəstələr üçün peyvənd əks-göstərişdir. Bu halda, həmin xəstələrin sənədləri poliklinika daxili nəzarət komissiyasından Xüsusi Komissiyaya göndərilir.

Aztibb.az xəbər verir ki, bu barədə 19 saylı Şəhər Poliklinikası baş həkimi Aytən Qurbanova məlumat verib.

Baş həkim bildirib ki, allergiyanın kəskin dövründə olan xəstələr 2-4 həftə arası müalicə aldıqdan sonra peyvənd oluna bilirlər: “COVID-19 əleyhinə peyvəndin hər hansı komponentinə qarşı reaksiyası olanlar təsdiqləyici sənəd təqdim etməlidirlər. Sənəddə peyvəndin birinci dozasını qəbul etdikdən sonra xəstədə yaranmış anaflaktik şok, kəskin allergik reaksiyalar təsdiqini tapmalıdır. Belə olan halda, həkim-nəzarət komissiyası həmin xəstələrin sənədlərini qəbul edir. Əsaslı olduğu halda müraciət edənə vaksinasiyaya qarşı əks-göstəriş sertifikatı təqdim edilir”.