Pediatr bildirib ki, uşağın ilk "peyvəndi" hesab edilən, onun immunitetini yüksəldən ilk süd – kolostrum uşağı doyuzdurmaq üçün kifayət edir və ana uşağı əmizdirdikcə südün miqdarı mədənin tutumuna uyğun tədricən artır. Burada süd vəzisinin ölçüsü və doğuşun aparılması yolu əhəmiyyət kəsb etmir:

 

"İlk vaxtlar gecə də daxil olmaqla uşağın tələbatına (ağladıqda, “ağzı axtardıqda”) uyğun yedizdirilir. Bu işdə atalar və nənə-babalar da anaya dəstək olmalıdır. Uşaq ağlayanda acından ağlamır. Əgər uşağın bezi gündə 2-3 dəfə sidiklə dolursa, deməli, uşağın ağlamağının səbəbi başqadır. Uşaqların döşü əmmə tezliyi fərqlidir, bəziləri 10 dəqiqədən sonra döşü bütünlüklə boşaldır, digərləri isə bunun üzərində 30-40 dəqiqə çalışır. Uşaq döş əmərkən lazım olan qidanın 50-90%-ni ilk 15 dəqiqədə mənimsəyir, sonrakı dövrdə o bunu rahatlıq üçün edir (oral period)".

 

Həkim bildirib ki, doğum evində həkim uşağa hər hansı süni qarışıq təyin edərsə, almağa tələsməyin. İnək südündən hazırlanan bu qarışıqlar uşaq orqanizminə yaddır. Süni qarışıqlar uşağın və ananın səhhətinə, hətta ailə büdcəsinə ziyandır. Sübut edilib ki, orta gəlirli ailənin süni qarışığa sərf etdiyi pul büdcənin 25-50%-ni təşkil edir.

 

"Hər birimiz bu məsələnin ciddiliyini və əhəmiyyətini ətrafımızda olan insanlara çatdırmalıyıq. Əgər klinikalarda yalnız ana südü verilirsə, həmin klinika "Körpə dostu klinikası" adlanır. Hədəfimiz bütün doğum evlərinin "Körpə dostu klinikası" olmasıdır", - deyə həkim əlavə edib.