Bundan başqa Pseudomonas, Klepsiella, Proteus və s. kimi bateriyalar da sidik yolları infeksiyalarına səbəb olurlar. Bu bakteriyalar normal şəraitdə bağırsaq florasında yaşayırlar və hər bir uşağın sidik yollarına dəfələrcə bu bakterialar bol miqdarda keçib və sidik vasitəsi ilə xaric olurlar. Nəticədə infeksiya baş vermir. Əgər sidik yollarında anadangəlmə hər hansı bir anatomik uroloji qüsur olarsa, o zaman sidik yolları infeksiyası qaçınılmaz olur.

 

Uşaqlarda sidik yolları infeksiyalarının 80%-i anatomik uroloji qüsurların payına düşür. Bu anatomik qüsurlara: anterior Uretral Valv, Posterior Uretral Valv, (sidik kanalında olmaması gərəkən anadangəlmə membranlar), Sirinqosele, Double Uretra, Sidik kisəsinin divertikulu, Ureterosele, Vezikoureteral Reflyuks xəstəliyi, sidik axarlarının anadangəlmə inkişaf qüsurları – ikiləşməsi və darlıqları kimi mürəkkəb uroloji qüsurlar daxildir.

 

Əgər uşaqlarda 1 dəfə qızdırmasız sidik yolları infeksiyası baş verərsə və Ultrasəs müayinəsində böyrək genişlənməsi yoxdursa sadəcə təqib edilməlidir. İnfeksiya qızdırmasız olub 1 dəfədən artıq təkrar olunarsa və sidiyin əkilməsi ilə təsdiqlənərsə mütləq araşdırılmalıdır. Əgər sidik yolları infeksiyası qızdırma ilə seyr edərsə ilk infeksiya olsa belə araşdırılmalıdır. Araşdırmağa başlamadan öncə ilk növbədə mövcud olan infeksiya uyğun antibiotiklərlə müalicə olunmalıdır.

 

Sidiyin əkilmə analizi tam normal olduqdan sonra araşdırmağa başlanılmalıdır. Ultrasəs müayinəsi, Sistoqrafiya müayinəsi, Radionuklit müayinə və bəzən KT-Uroqrafiya, MR-Uroqrafiya, Sistoskopiya kimi müayinələr diaqnozu dəqiqləşdirmək və infeksiyaya səbəb olan anatomik uroloji qüsurları müyyənləşdirmək üçün istifadə edilə bilər. Diaqnoz tam dəqiqləşdikdən sonra anatomik qüsurların cərrahi olaraq korreksiya edilməsi planlanmalıdır.