Birincisi, yenidoğulmuşlar üçün ana südünün əhəmiyyətini qeyd edək. Bunun ananın tamamilə şəxsi qərarı olduğuna baxmayaraq, körpələri minimum 6 ay ərzində yalnız ana südü ilə yedizdirən analar əmin ola bilər ki, uşaq sağlam böyüyəcək.

 

İkincisi, uşaqları erkən yaşdan müntəzəm olaraq əllərini yumağa vərdiş etdirin. Yaddan çıxarmayın ki, infeksiyaların 80%-i təmas vasitəsilə keçir. Körpənizə öskürdükdən və asqırdıqdan sonra əllərini yumağı öyrədin. 20 saniyə ərzində ilıq su və sabunla yuyulan əllərdə bakteriyalar və viruslar məhv olur, ağciyər infeksiyaları ehtimalı 45% aşağı düşür.

 

Üçüncüsü, vaxtlı-vaxtında peyvəndləri vurdurun. Uşaqların vaksinasiyası qrafikinə riayət edərkən pediatrınızla məsləhətləşin. İmmunizasiya körpə vaxtlarından başlayır və yetkinlik yaşına qədər davam edir. Bu zaman qızılca, epidemik parotit, suçiçəyi, rotavirus və digər infeksiyaların qarşısını almış olarsınız. Hər il mütləq qripə qarşı da peyvənd vurdurmağı unutmayın. Bu, xüsusilə astma və digər xroniki xəstəlikləri olan uşaqlar üçün vacibdir.

 

Dördüncüsü, uşaqların yuxu rejimi var. İmmunitetin möhkəmlənməsi üçün onlar yatıb yuxularını almalıdırlar. Yuxu rejimi uşaqların yaşına uyğun seçilir: 0-3 aylıq körpələr gündə 14 saatdan 17 saata qədər, 4 aydan 1 yaşa qədər uşaqlar 12-16 saat, 1 yaşdan 2 yaşa qədər uşaqlar 11-14 saat, 3 yaşdan 5 yaşa qədər uşaqlar 10-13 saat, 6-12 yaş arası uşaqlar 9-12 saat, 13-18 yaşlı yeniyetmələr isə 8 saatdan 10 saata qədər yatmalıdırlar.

 

Yuxusuzluq orqanizmin sitokin adlandırılan zülal hazırlaması qabiliyyətini məhdudlaşdırır. Sitokinlər infeksiya ilə mübarizə aparır və iltihabı azaldırlar.

 

Beşincisi, uşaqların sağlam qidalanmasına üstünlük verin, bu, uşaqların immun sistemi üçün çox mühümdür. Düzgün seçilmiş qidalar: meyvə, tərəvəz uşaqların kifayət qədər vitamin (əsasən A və E vitaminləri) almasını təmin edir. Emal olunmuş qidaları uşaqların rasionundan çıxarın. Hazırda satılan meyvə şirələrini, qazlı içkiləri, çipsiləri, suxariləri və s. uşaqlarınıza öyrəşdirməyin.

 

Unutmayın ki, bütün bu qaydalara ciddi riayət etsəniz də, uşağınız hər hansı infeksion xəstəliyə yoluxa bilər. İmmun sistemi möhkəm olan uşaqlar onu ağır keçirməyəcək. Xəstəliyə yoluxmuş uşaqları pediatrın müayinəsinə aparmaq mütləqdir.