Ailəvi Aralıq dənizi qızdırması, periodik xəstəlik, erməni və ya yəhudi xəstəliyi, eləcə də FMF adı ilə bilinən xəstəlik adətən 20 yaş altında başlayan, periodik olaraq bir neçə aydan bir qarın ağrısı, döş qəfəsində ağrı, qarın boşluğunda və ağciyərlərdə maye toplanması, yüksək qızdırma, oynaq ağrısı, dəridə qızarıqlıq ilə müşahidə olunur. Xəstələrin 50% dan çoxunda ailə üzvlərində də bənzər şikayətlər olur. FMF ölkəmizdə görülsə də xəstələr illər boyunca düzgün diaqnoz qoyulmamasından əziyyət çəkir, hətta yanlışlıqla apendisit diaqnozu ilə əməliyyat da oluna bilirlər.

Aztibb.az xəbər verir ki, bu barədə Daxili xəstəliklər üzrə uzman-həkim Ramin Cavadov sosial şəbəkədə məlumat verib. 

Həkim qeyd edib ki, xəstəliyin diaqnostikasında genetik analizlər, rutin qan analizləri yardımcı olsa da əsas olan anamnez ve klinik əlamətlərdir.

"Son FMF xəstəm 36 yaşında kişi olub. 13 yaşından şikayətləri başlayıb, apendisit diaqnozu ilə əməliyyat olunub, lakin sonralar ildə 4-5 dəfə ataklar təkrarlanmış olsa belə müxtəlif həkim baxışlarına baxmayaraq FMF diqanozu qoyan olmayıb".