Aztibb.az xəbər verir ki, bu barədə Mərkəzi Klinikanın uşaq cərrahiyyəsi və urologiyası uzmanı, cərrah Fuad Hüseynov sosial şəbəkədə məlumat verib.

 

Həkimin sözlərinə görə, valideynləri 9 ay öncə birdən-birə uşağın boğulmağa başladığını görüb. Anasının ilkin müdaxiləsindən sonra uşaq nəfəs almağa başlayıb. Həmin gündən etibarən qızdırma, öskürək, çəki və inkişafdan geriqalma başlayıb. Uşaq fərqli diaqnozlarla müalicə alsa da, vəziyyətində yaxşılaşma olmadığı üçün Mərkəzi Klinikaya müraciət ediblər:

 

"Aparılan müayinələr nəticəsində məlum olub ki, uşağı bu vəziyyətə salan, sağ ana bronxu tıxayıb davamlı öskürək, qızdırma və infeksiyaya səbəb olan yad cisimdir. Bronxoskopiya, yəni işıqlı alətlə nəfəs borusuna girilərək 9 ay ərzində nəfəs borusunda yaşayan yad cisim nəhayət ki çıxarılıb. Əməliyyat riskli olsa da, uğurla başa çatıb. Körpə 1 gün sonra rahat nəfəs alaraq evinə yola salınıb".