COVID-19 pandemiyasının yayılma təhlükəsi səbəbindən sərhədlər bağlandığı üçün ölkəmizdə qalan daha 16 Qazaxıstan vətəndaşı və bu ölkədə yaşamaq hüququ olan 19 Azərbaycan, 1 Özbəkistan və 2 Rusiya vətəndaşı bu gün Qazaxıstana yola salınıblar.

"Bakı Beynəlxalq Dəniz Ticarət Limanı" QSC-dən Aztibb.az-a bildirilib ki, “Azərbaycan Xəzər Dəniz Gəmiçiliyi” QSC-nin “Merkuri 1” bərə gəmisi ilə yola salınan vətəndaşlar ilk olaraq, Bakı Limanında COVID-19 pandemiyası ilə əlaqədar testdən keçiriliblər və testin nəticələri bütün sərnişinlərdə neqativ çıxıb.

Xatırladaq ki, bu il may ayının 13-dən Qazaxıstanda karantin dövründə sərhədin keçilməsinə dair yeni qaydalar qüvvəyə minib. Bu səbəbdən Kurık limanı ölkə vətəndaşları və ölkədə yaşamaq icazəsi olan xarici vətəndaşların qəbulunu bərpa edib. Son 4 ay ərzində isə ümumilikdə 210 Qazaxıstan vətəndaşı və 133 xarici ölkə vətəndaşı Bakı Limanından yola salınıb.