Prostat vəzin xoşxassəli hiperplaziyası (adenoma) kişilərdə xüsusən 50 yaşdan yuxarı kişilərdə tez-tez rast gəlinən patologiyadır. Xoşxassəli olmasına baxmayaraq bu patologiya bir çox problemlərə və narahatlığa səbəb olur.
Aztibb.az xəbər verir ki, bu barədə həkim-radioloq Fatimə Tağıyeva məlumat verib.
Həkimin sözlərinə görə, adenomanın ölçülərinin böyüməsi sidik kanalının sıxılmasına səbəb olur və bu, aşağıdakı simptomların yaranmasına gətirib çıxarır:
- Tez-tez sidik ifrazı;
- Gecə saatlarında sidik ifrazının artması. Bu da yuxuya mane olur;
- Sidik axının, təzyiqinin azalması, qırıq-qırıq sidik ifrazı;
- Sidik ifrazına istəkdən sonra dərhal sidiyin xaric edilməsi;
- Sidik kisəsinin tam boşalmaması hissi, sidik ifrazının 5-10 dəqiqə ara ilə təkrarlanması;
- Sidik ifrazı zamanı gücənmə;
- Sidik kisəsinin dolğunluğu zamanı, sidik saxlamada çətinlik.
Həkim qeyd edib ki, prostat vəzin xoşxassəli hiperplaziyası USM vasitəsilə asanlıqla müəyyən olunur. Müayinə zamanı prostat vəzin hüdudları, ölçüləri, həcmi və strukturu qiymətləndirilir. Adenoma varsa onun ölçüləri, lokalizasiyası, həmçinin sidik kisəsində qalıq sidiyin həcmi müəyyən edilir. Prostat vəzin USM-i üçün sidik kisəsi dolu olmalıdır.
