Bir sıra maddələr məhz asılılıq yaratdığı üçün onlar narkotik maddə adlandırılırlar. Həmin maddələrin istifadəsi təhlükəlidir. Narkotik istifadə edənlərdə orqanizmin maddələr mübadiləsi pozulur və belə xəstələrdə şəxsiyyət pozuntusu müşahidə edilir. Narkotik maddədən istifadə zamanı həm fiziki, həm psixoloji asılılıq yaranır. Aqressiya, yuxusuzluq, iştahsızlıq, dəhşətli bədən ağrıları və həzm sistemi problemləri fiziki asılılığın başlıca əlamətləridir. Həmin simptomları olan xəstələr yenidən narkotika istifadə edərək sakitləşmək istəyirlər. Həmçinin narkotik maddədən bir dəfə istifadə etdikdə xəstədə növbəti dəfə narkotikdən istifadə üçün güclü meyil yaranır. Sağalmaq istəyi güclü olan xəstələr bu cür psixoloji asılılığa qalib gələ bilirlər. Xəstələr müalicə prosesində psixoloq nəzarətində olur, həmçinin xüsusi reabilitasiyalardan keçirlər.

Bu fikirləri Səhiyyə Nazirliyi Respublika Narkoloji Mərkəzinin şöbə müdiri Zamin Əliyev deyib.

Z.Əliyev bildirib ki, narkoloji xəstələri sağaltmaq mümkün olsa da, çətin prosesdir: “Sağalandan sonra da bizimlə daimi kontaktda olan, lazım gəldikdə müalicəyə cəlb edilən xəstələr var. Statistik olaraq bu göstərici yüksək olmasa da, iradəsi güclü olanlar arasında sağalma halı müşahidə edilir. Sağalmaq üçün psixoloq seanslarını yubatmamaq və özünütərbiyə vacibdir”.

Onun dediyinə görə, müalicəsi başa çatan, fiziki asılılıqdan xilas olan hər kəs yeni növ koronavirus (COVID-19) infeksiyası əleyhinə peyvənd vurdura bilər: “Belə xəstələrdə yalnız psixoloji narahatlıq qalır, yəni onlarda heç bir fiziki simptom olmadığı halda narkotik qəbul etmək istəkləri güclü olur. Hesab edirəm ki, belələri koronavirusa qarşı vaksinasiya oluna bilərlər. İstənilən halda, infeksionistlə məsləhətləşmək lazımdır. Ümumiyyətlə COVID-19 virusu narkoloji xəstələrin müalicəsi prosesində bəzi çətinliklər yaradır”.

Z.Əliyev vətəndaşları, xüsusilə gəncləri narkotik maddələrdən uzaq durmağa çağırıb: “Gənclərlə elə narkotik asılılıqdan əziyyət çəkənlərin dili ilə danışmaq istəyirəm. Narkoloji xəstələrin tək istəyi digərləri kimi normal həyatdan həzz ala bilməkdi. Yəni, onlar böyük bir şey istəmirlər. Sadəcə ətrafındakılarla söhbətdən, iş fəaliyyətindən və yaxud da müəyyən əyləncələrdən zövq almağı arzulayırlar. Narkotikdən asılı olanlar daim depressiyadadırlar, həyat onları sıxır. Həyatda azad olmaq, heç nədən asılı olmamaq ən gözəl nemətdir. Məsləhətim budur ki, gözəl həyatınızı depressiya, stress, narahatlıq dolu həyata çevirməyin. Əks halda, ömür boyu normal həyata qayıtmaq üçün mübarizə aparmaq məcburiyyətində qalacaqsız. Sağlam həyata davam etmək üçün narkotik maddələrə "yox" deməliyik”.