Şəkərli diabet xəstələrinin qeydiyyatı 3 aydan bir yenilənir. Bu ilin iyununda aparılan sonuncu qeydiyyata əsasən, ölkədə təxminən 280 min şəkərli diabet xəstəsinin olduğu müəyyən edilib. İyul və avqust aylarının qeydiyyatı sentyabrda aparıldıqdan sonra dəqiq rəqəm məlum olacaq. Hazırda isə ölkədə təxminən 290 min şəkərli diabet xəstəsinin qeydiyyatda olduğunu deyə bilərik.
Bu fikirləri Səhiyyə Nazirliyinin baş endokrinoloqu Babək Salek Qənnadi deyib.
O bildirib ki, hətta qeyri-rəsmi rəqəmlərə əsasən, ölkədə 500 min şəkərli diabet xəstəsinin olduğunu da demək mümkündür: “Deməli, dünyada belə bir tibbi qayda var: qeydiyyatda olan şəkər xəstələrinin ümumi sayı qədər öz xəstəliyindən xəbərsiz olan şəkərli diabet xəstələri var”.
Baş ekdokrinoloq şəkərli diabet xəstələrinin ölüm səbəbləri barədə məlumat verib: “Ötən il qeydiyyatda olan şəkərli diabet xəstələrindən 3510 nəfər kişi və 4141 nəfər qadın müxtəlif səbəblərdən dünyasını dəyişib. Şəkərli diabet xəstələri arasında ölüm halı yanaşı olaraq ürək-damar xəstəliklərindən əziyyət çəkənlər arasında daha çox baş verir. Bundan başqa, beyində qansızma, onkoloji xəstəliklər və qanqrena da şəkərli diabet xəstələri arasında ölümə səbəb olan amillərdəndir. Onu da qeyd edim ki, xəstələnənlərin və şəkərli diabet xəstələri arasında dünyasını dəyişənlərin əksəriyyəti 51 yaşdan yuxarı olanlardır”.
B.S.Qənnadi, həmçinin ölkədə koronavirus əleyhinə aparılan vaksinasiyanın əhəmiyyətindən danışıb:
“Şəkərli diabet yeni növ koronavirus (COVID-19) infeksiyası üçün risk faktorudur. Yəni, şəkərli diabeti olanlar koronavirusa daha tez yoluxa və xəstəliyi daha ağır keçirirlər. COVID-19-la mübarizədə qalib gələ bilmək üçün vətəndaşların peyvənd vurdurmasına ehtiyac var. Nəzərə almaq lazımdır ki, tarix boyu bir çox xəstəliklərin öhdəsindən peyvəndlərlə gəlmişik. Əsassız fikirlərə uymadan, tam stressiz şəkildə vaksinasiyada iştirak etmək lazımdır. Peyvəndləmə profilaktikadadır. Vaksin olunaraq özümüzü və yaxınlarımızı qorumalıyıq”.
