Aztibb.az xəbər verir ki, həkim-pediatr Aytən İsmayılzadə bu barədə məlumat paylaşıb. O, bildirib ki, artıq sadəcə anaferon, erqoferon, viferon ilə də keçinmək olmur. Amma hər bir halda hərarətli günlərin əvvəlində antibiotikdən uzaq olmaq, göstəriş olmadıqca istifadə etməmək, hərarət salıcılardan da çalışdıqca az istifadə etməyə çalışmalıyıq:

 

"İndi qeyd edəcəyim preparatlar virusla mübarizədə kömək edən, təyin etdiyim immunostimulyator vasitələrdir. Eyni tərkibli inoseda və qroprinosin. Bu dərmanların tərkibində olan inozin pranobeks nədir? Virusa necə təsir edir? Bildiyimiz kimi, viruslara qarşı mübarizədə immun hüceyrələr aktiv olmalıdır. Əsasən də killer t-limfositlər, hansı ki birbaşa virusları məhv etməyə yönəlir. Bu preparatlar onların aktivliyini artırır. İgG anticisimlərin, qamma interferon, interleykinlərin yaranmasını sürətləndirir. Sağalma prosesi tezləşir, bakterial ağırlaşmaların qarşısı alınır. Təcrübəmdən görürəm ki, uşaqlara virusla mubarizədə kömək edir".

 

A.İsmayılzadə bu preparatların 1 yaşdan yuxarı uşaqlara təyin edildiyini vurğulayıb. Qeyd edib ki, hər bir halda həkim təyinatı lazımdır. Doza çəkiyə görə hesablanır. Tabletindən böyüklər də istifadə edə bilər.

 

Onun sözlərinə görə, uşaqlara viruslardan profilaktika məqsədilə sirop formasında günaşırı 28 gün ərzində gündə üç dəfə olmaqla çəkiyə görə verilir. Müalicə vaxtı isə çox da gec olmadan yəni virus infeksiyası başladıqda 7-10 gün ardıcıl verilməsi lazımdır. Uşaq 12 kq-dırsa, deməli, günə 12 ml, yəni gün ərzində hər dəfə 4 ml olmaqla üç dəfə verilməlidir. 7-8 yaşdan isə artıq tablet kimi qəbul edə bilərlər. Bir tablet üç dəfə yeməkdən sonra.