Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının şöbə müdiri, tibb elmləri doktoru Nuran Abdullayev ölkədə yoluxma halları pik həddə çatdıqca üzə çıxan ciddi problemlərdən bəhs edib. 

Aztibb.az xəbər verir ki, həkimin sözlərinə görə, bu problemlərin əsasını xəstələrin çarəsiz qalaraq evdə özbaşına bütün dərmanları qəbul etmələri, xəstələrin həkimsiz qalması, daha doğrusu həkim və tibbi xidmət üçün edilən rəsmi müraciətlərin cavabsız və ya icrasız qalması və ölüm qorxusu təşkil edir.

"Qeyd etdiyim problemlərin sayını artırmaq da olar. Lakin məhz bu 3 bənd artıq kifayətdir ki, səhiyyə sisteminin bu gün dekompensə olduğunu, artıq bacarmadığını söyləyək. Bu günlərdəki yoluxma sayını da nəzərinizdə saxlayın. Bu qədər sayla ortada göstərilə bilməyən tibbi xidmət varsa, heç vaxt inkişaf etmiş və ya inkişaf etmək istəyən səhiyyədən danışmaq olmaz. Problemlərin üzə çıxma səbəbləri insanların səhiyyə sisteminə artıq etibarlarının qalmaması, daha doğrusu səhiyyə sisteminin öz etibarını itirməsidir. Bu problemin həllinə illər sərf olunacaq. Həllinə isə sabah başlamaq artıq gecdir, indi başlamaq lazımdır! Səhiyyə qurumları arasında ciddi koordinasiyasızlığın olması ciddi hazırlıqsızlıq deməkdir", - N.Abdullayev qeyd edib.