Aztibb.az-ın xəbərinə görə, həkim deyib ki, uzun müddət CPAP (Continious Positive Airway Pressure) cihazı və ya sadə üz maskasında təngənəfəs vəziyyətdə qalmış xəstəni intubasiya etməyə qərar verdinizsə, bunları nəzərdə saxlayın:

 

1. İntubasiyanı aranızdakı ən təcrübəli reanimatoloqun etməsinə şərait yaradı. Bilin ki, uzun müddət CPAP-da qalmış koronavirus xəstəsinin səs telləri əsnək, ağız udlaq hissə tam ödemləşmiş və rəngini dəyişmiş olur. Boyunun arxa tərəfə hərəkəti də məhdudlaşır. Boyun arxa tərəfdən ödemləşməsinə CPAP xəstələrində çox rast gəlinir. Həm də bu qərara adətən ani gəlinir, xəstə yemək yemiş, su içmiş vəziyyətdə olur. Ona görə də requrqitasiya olacağı ehtimalını da nəzərə alın. COVID-19 ilə mübarizə aparmış reanimatoloqlar da bu halları təsdiqləyə bilər.

 

2. Nəzərə alın ki, belə xəstədə anesteziyaya giriş zamanı arterial təzyiq kəskin aşağı enə, hətta sıfra düşə bilər. Ona görə propofol cəmi 1 mg/kg tətbiq edin, ya da giriş üçün ketamin anestetikindən istifadə edin. Əvvəlcədən mezaton ya dofamin qatılmış mayeni venaya qoşub hazır saxlayın. Arterial təzyiq kəskin endikdən sonra tibb bacısı dofamin tapana, qoşana qədər iş işdən keçmiş ola bilər. Girişdə kəskin hipotenziya ilə qarşılaşmaq ehtimalınız 99%-in üzərindədir və oksigenizasiya ciddi pozulmuş xəstədə bu fatal nəticə ilə bitə bilər.

 

3. CPAP-da uzun müddət saxlanmış xəstəni intubasiya edərkən ditilin miorelaksantından uzaq durun. Onsuz da bütün ağır koronavirus xəstələrində böyrəklərdə disfunksiya olur, hiperkaliemiya fatal ürək aritmiyalarına səbəb ola bilər. Arduan isə qəti məsləhət deyil. Xəstənin toxqarına olduğunu düşünməlisiz. 4-5 dəqiqə ventilyasiya etməyin necə bir problem yarada biləcəyini unutmayın. Təəssüf ki, bir çox klinikalarda miorelaksant kimi yalnız arduanı tapmaq olur.