Böyrək biopsiyası  böyrək xəstəliklərinin morfoloji diaqnozunu qoymaq və gələcək proqnozu təyin etmək üçün əhəmiyyətli bir müayinə metodudur.

Bu barədə həkim-nefroloq Zaur Əhmədov məlumat verib. Onun sözlərinə görə, sidiyində zülal və ya qan olanlar, ailədə irsi böyrək çatışmazlığından əziyyət çəkənlər, bundan əlavə, böyrək transplantasiyası olmuş xəstələrdə (ehtiyac olarsa) böyrək biopsiyası tətbiq olunur.

Z.Əhmədov biopsiyadan öncə xəstənin bəzi qan dəyərlərinə baxıldığını, bundan sonra onun qan qrupuna uyğun kütlənin (eritrositlər) saxlanıldığını deyib. Bildirib ki, sonra pasiyent ultrasəs müayinəsi altında radioloq tərəfindən biopsi olunur. Oradan alınan toxuma patoloji bölməyə göndərilir və sitoloji analiz edildikdən sonra morfoloji diaqnoz qoyulur.

Həkim onu da qeyd edib ki, xəstə biopsiyadan sonra bir sutka nəzarətdə saxlanılır: “İlk 4 saat ərzində 30 dəqiqədən bir xəstənin arterial təzyiqi, nəbzi yoxlanılır və yara yerinə baxılır. 4 saatın sonunda hemoqramma yoxlanılır. Əgər qan dəyərlərində dəyişiklik yoxdursa, xəstə nəzarətə alınır. Və 24 saat bitdikdən sonra 2 həftə aktiv hərəkət və idmandan uzaq durmaq şərtilə evə buraxılır”.

Nefroloq onu əlavə edib ki, böyrək biopsiyasını sürətli proqressivləşən böyrək xəstəlikləri zamanı gecikdirmədən  etmək vacibdir.  Çünki zaman keçdikcə, xroniki böyrək çatışmazlığı yarana bilər. Bu halda  biopsiya etdikdə belə sonrakı müalicələr fayda vermir.