Aztibb.az xəbər verir ki, “Həkim məsləhəti” rubrikasında Mərkəzi Gömrük Hospitalının həkim-terapevti Xumar Novruzova “Koronavirusa yoluxmalar yenidən artır. Özümüzü qorumaq üçün nələri etməliyik” sualını cavablandırarkən belə deyib.

19 avqust 2021-ci il üçün dünya üzrə koronavirusun yayılma statistikasına nəzər salsaq, görərik ki, bu günə qədər yoluxmaların sayı 210 477 594, ölüm hallarının sayı 4 411 792 olmuşdur. Hazırda bütün dünyada aktiv kovid xəstələrinin sayı 17 529 863 nəfərdir.

 

Son günlər Azərbaycanda da koronavirus infeksiyasına yoluxma halları 4 mini keçib. Ölüm hallarının da sayı artaraq 20-ni ötüb. Təbii ki, bu da ölkəmizdə hər kəsin narahatlığına səbəb olub.

 

Dünya alimləri bu öldürücü virusu aradan qaldıran dərman tapmayıblar. Hələlik koronavirusdan yan keçməyin, yüngül keçirməyin yeganə yolu vaksinasiyadır. Bir çox ölkələrdə olduğu kimi, Azərbaycanda da vaksinasiya prosesi sürətlə gedir, 6 milyona (18 avqust 2021-ci il – 5 932 734) qədər vaksin dozası vurulub. Lakin reallıq odur ki, son günlər koronavirusa yoluxmalar yenidən kəskin artıb. Ona görə də, virusdan qorunmaq üçün qoyulan məlum qaydaları bir daha nəzərdən keçirək.

 

Eyni zamanda, koronavirusun “Delta” ştammının yayılması da yoluxma sayının artmasında mühüm rol oynayır.

 

Bir həkim kimi məsləhət görərdim ki, insanlar çimərliklərdə, toy və yas mərasimlərində, avtobus dayanacaqlarında sosial məsafə qorusunlar, qoyulan qadağalara əməl etsinlər.

 

Təkrar da olsa, vurğulamaq istəyirəm ki, koronavirusa yoluxmamaq üçün ən etibarlı yol – vaksinasiyadır. Peyvənd olunanlar arasında yoluxma riski azalır və xəstələndikdə də, bunu bir qədər yüngül keçirirlər.

 

Peyvəndlə yanaşı tibbi maskalardan düzgün istifadə etmək, sosial məsafə saxlamaq və gigiyena qaydalarına riayət etmək də mühüm rol oynayır.

Bu sadə qaydalara riayət etməklə, koronavirusdan qorunmaq mümkündür.